Shimla press tour thlirletna hun hmang

April 6-12, 2015 chhunga AMC bultuma Shimla, Himachal Pradesh tlawhtu MJA member 10-te leh AMC hotute chuan April 13, 2015 khan AMC hall-ah an zin dan thlir letna leh sawihona hun an hmang a; AMC chairman CT Zakhuma, hotu dangte leh MJA hruaitute'n an hmanpui.

Inkawmhonaah hian MJA member-te chuan Shimla khawpui kalphunga an zir chhuahte leh Aizawl khawpui tana ṭangkai tur nia an hriatte an sawi a, AMC hotute'n zawhna hrang hrang an zawt a ni.

MJA member-te hian Shimla-a an chàm chhungin Shimla Municipal-in khawpui bawlhhlawh an sawngbawlna hmun te, Indian Institute of Advanced Studies hmunte an tlawh a, Shimla mayor Sanjay Chauhan an kâwm bawk.

MJA member-te chuan, Shimla Municipal chuan Shimla khawpuiah British hun lai aṭang tawhin Property Tax an la a, chu chu an sum lak luhna hnâr ber a nih thu te; Asian Development Bank sum hmangin Shimla an chei dawn a, chung zingah chuan rope-way siam a tel thu te; polythene hman an khap thu te; ni tin khualzin 5,000-7,000 velin an tlawh ziah anga chhût a nih thute an sawi.