Lalduhoma hêktute an dem

ZPM Tuirial East Block Committee chuan thuchhuah siamin, MNF MLA-te'n ZPM Legislature Party leader Lalduhoma paih tuma hma an la chu an dem thu an sawi a; Lalduhoma leh ZPM tan theihtawp chhuahin, a thlavang an hauh tlat dawn thu an tarlang.

'Pathian leh kan ram tan' tia CM Zoramthanga leh a kaihhruai MNF party sorkar chu ṭha takin an kal mek emaw an tih thu sawiin Tuirial ZPM chuan, "Pathian leh kan ram tana hna thawktute chêt dan kan hriat hian rilru a tiná a, ram hmasawnna kawng a hawi ta lo hle niin kan hria a, pawi kan ti tak zet a ni," an ti.

Tuirial East Block ZPM chuan, Lalduhoma chu kum 2018-a MLA inthlanpuiah ZPM chief ministerial candidate a nih thu leh chumi atana dah a nih thu chu May 8, 2018-ah Chanmari YMA Hall-a ZPM Assembly-ah puan a nih thu an tarlang. Lalduhoma pianna khua, Tualpuia ZPM pawhin thuchhuah siamin, "Kan khaw pa, Pu Lalduhoma, MLA a nihna aṭanga báng tura MNF MLA 12-te'n an hêk hi mak kan ti a, kan dem tak zet a ni," an ti.