Sorkarin Disturbance Act a duang mek

Home minister R Lal­zirliana chuan, Mizorama hel chêtna ṭhinte chu hmun ralmuang lo, disturbed area-a puan a nih theih nan sorkarin hma a la tih sawiin, chuta tan chuan Mizoram sorkarin Disturbance Act a neih ve theih dan tur ngaihtuah mek a nih thu a sawi.

Nimina Congress Bhavan-a Dr BR Ambedkar piancham lawmna inkhawmah thu sawiin, Home Minister chuan, "Mizorama hmun ṭhen­khat, helho chêtna ṭhinte chu disturbed area-a a puan theih nan sorkarin hma a la a, Disturbance Act nei turin chak takin bawhzui a ni a; Assembly-a pass ngai a nih avangin uluk taka dan duan mek a ni," a ti.

Party ṭhenkhatte'n Mizoram hmar tlangdungah disturbed area puang lo tura sorkar an ngen chungchangah R Lalzirliana chuan, "Mizoram sorkar leh HPC inremna chu sorkarin a bawhchhe hmasa zawk niin sawi mah se, a rinawm lo hmasa zawk chu HPC-te an ni," a ti. Helhote'n pawi khawih nan silai ṭha an hmang a, mahse sorkara an inpekin silai ṭha an luhpui lo tih sawiin, "Mizoram sorkar leh HPC(D)-te'n inremna an nei ngai lo," a ti.

Home Minister chuan, political party tin hruaitute nen April 13, 2015-a a pisaa an ṭhutkhawmnaah, HPC(D)-te chu a rang thei ang bera dan páwna hnâwl an rèl thu a sawi a; dan leh thupek kenkawhna leh venhimna thilah eptu party-te rilru put hmang chu lawmawm a tih thu a sawi bawk.

Village council leh local council inthlan tur chungchang sawiin, R Lalzirliana chuan, an party darthlalang tur a nih avangin fimkhur taka thil tih a ṭul thu a sawi a; state sorkarah term 3/4 chhung sorkarna chan an duh chuan mi dangte tana malsawmna nih leh thilphalte a ngaih thu sawiin, eptute thanga âwk lo turin an party mipuite a chah a ni.

R Lalzirliana chuan, India Constitution duan­naa mi pawimawh bera ngaih, Dr BR Ambedkar chu mi ropui leh entawn tlak a nih thu sawiin, chawimawi phû a nih angin an party chuan an chawimawi tih a sawi a; sorkarin chawlh puang mahse Delhi-a an hotute ngen angin a piancham an lawm tih a sawi bawk.