Zirtirtu lâkah politics a inrawlh lo - School Education Minister
Nimin khan Saitual district education office pisa leh Samagra Shiksha district project office hawn a ni. Pisa hawngtu School Education minister Lalchhandama Ralte chuan, tun hnaia zirtirtu lakah politics a inrawlh lo niin a sawi.
Minister Lalchhandama Ralte chuan, ram leh hnam chherna pûm berah politics a inrawlh chuan a fuh dawn lo tih sawiin, "Tun hnaia sorkarin zirtirtu a lâk tharah a thiam thiam, a fit fit lak a ni. Politics a inrawlh lo. Hindi teacher lak tharah pawh a thiam thiam lâk an ni a, lâk tur qualify-in an daih lo zawk. Tu sorkar mahin an tih ngai loh chu tun sorkarah hian tih a ni," a ti.
Lalchhandama Ralte chuan, zirna chu hnam thinlung pu chunga kalpui sorkarin a duh thu sawiin, "Zirlaibu siamah pawh a theih chin chinah hnam thinlung putna tur telh tum a ni," a ti a; ram hmasawn zelnain hnam hmangaihna a kalsan ang tih a hlauhawm thu a sawi.
Pisa hawnna inkhawm hi Saitual DC VL Hruaizela'n a kaihruai a, Human Resources Devlopment Board vice chairman L Thangmawia, MLA leh C Lalmuanpuia, MLA-te pawhin thu an sawi.
Saitual district tharah hian khaw 41-ah sorkar primary school 57, sorkar middle school 51 leh Samagra Shiksha MS pakhat, sorkar high school leh Samagra Shiksha school 23 leh, higher secondary school pathum a awm a ni.