COVID-19: Mizoram dinhmun Hripui vei 31 hmuh belh a ni

December 15, Thawhlehni khan Mizorama swab sample 1,512 endik aṭangin Covid-19 vei mi 31 hmuh chhuah a ni a; nimin khan hripui laka fihlîm tawh mi 12 chhuahtir a ni thung.

Covid-19 vei Thawhlehnia hmuh chhuahte chu mipa 24 leh hmeichhia pasarih an ni a; ZMC laboratory-a hmuh mi pasarih, TrueNAT-PCR hmanga hmuh mi 11 leh Rapid Antigen Test (RAT) hmanga hmuh mi 13 an ni.

Hripui laka fihlîm tawh mi 12 chu nimin khan enkawlna hmun aṭangin chhuahtir an ni a; Aizawl district-ah mi pasarih, Serchhip district-ah mi pahnih, Lunglei, Kolasib leh Lawngtlai district-ah mi pakhat ṭheuh an chhuak.

Mizoramah swab sample 1,67,275 endik tawh aṭangin Covid-19 positive mi 4,080 (2.44%) hmuh chhuah a ni tawh a, mipa 3,003 leh hmeichhia 1,077 an ni. Nimin tlai dar 5 thleng khan mi 3,906 (96.15%) chhuahtir an ni tawh a, mi pasarih (0.17%) thi tawhin, enkawl mek mi 167 (3.68%) an awm.

Mizorama Covid-19 positive hmuh chhuah tawh mi 4,080 zinga mi 1,918 chu Mizoram chhunga kái an ni a, mi 2,131 chu state páwn aṭanga rawn lût an ni.

December 15, Thawhlehni khan ZMC laboratory-ah Aizawl district leh Lunglei district-a mi 603, TrueNAT-PCR hmangin district pariatah mi 154 leh RAT hmangin district 10-ah mi 755 endik a ni a; chu'ng aṭang chuan hripui vei mi 31 (2.05%) hmuh chhuah a ni.

Covid-19 positive hmuh thar mi 31 zinga 16 chu Mizoram chhunga hri kái an ni a, an zingah hri kai ṭanna hriat loh mi pali leh chanchin la hriat chian loh pakhat an awm. Mi 31 zingah natna (Covid-19 symptom) lang chhuak mi panga an awm bawk.

Sorkar thuchhuah tarlan danin, ZMC laboratory-a RT-PCR hmanga Covid-19 vei hmuh chhuah mi pasarihte chu mipa paruk leh hmeichhia pakhat, kum 20-34 inkar an ni a, Aizawl district-a sample lâk vek an ni. An zinga pahnih chu tualchhunga hri kai an ni a, mi panga chu hnam dang, state páwn aṭanga rawn lut an ni.

TrueNAT-PCR hmanga hripui vei hmuh chhuah mi 11-te chu mipa pakua leh hmeichhia pahnih, kum 21-39 inkar an ni a; state páwn aṭanga tun hnaia rawn lut mi 10 leh tualchhunga hri kái mi pakhat vek niin, symptom nei an awm lo.

RAT hmanga Covid-19 positive hmuh chhuah mi 13 chu mipa pakua leh hmeichhia pali an ni a, Mizoram chhunga hri kái vek niin, an zingah naute kum 1 mi pahnih an tel. Mi 13 zingah hian Covid-19 symptom nei pathum an tel a ni.

Ramthar North - 1: Mipa kum 30, mahni inrinhlelh vang leh symptom neih vanga sample endik, hri kàina hriat loh.

Zemabawk North - 1: Hmeichhia kum 20, result update laiin a chanchin kimchang la hriat loh.

Falkawn - 5: Mipa kum 21-34, Silchar aṭanga ZMC building sa tura rawn lut, symptom nei lo vek.

BSF, Melte - 1: 131 Bn. BSF sipai kum 39, an batallion hmun Meltea awm; Mizoram chhunga hri kái, symptom nei lo.

Tlabung - 2: Hmeichhia kum 22 & 23, tun hnaia Shillong aṭanga haw, symptom nei lo.

South Lungrang - 8: Mipa kum 21-38, APS Hydro hnuaia thawk, Uttar Pradesh leh Bihar aṭanga rawn lut, company camp-a khung hran lai, symptom nei lo vek.

Durtlang Leitan - 1: Hmeichhia kum 1, hri kài ṭanna hriat, symptom nei.

Durtlang Ramthar - 2: Nupa - mipa kum 40 leh hmeichhia kum 31. Aizawla damdawi-in pakhata hmuh chhuah, symptom nei ve ve, hri kàina hriat loh.

Falkland Veng - 1: Mipa kum 53, zin chhuah tum vanga test, hri kaina hriat loh, symptom a nei lo.

Thenzawl - 1: Hmeichhia kum 31, a chenpui zinga +ve hmuh tawh, home quarantine lai, symptom nei.

Lawngtlai-III - 2: Mipa kum 1 & 7; hri kai ṭanna hriat, symptom nei lo ve ve.

Lawngtlai AOC Veng - 3: Mipa kum 16 & 38 leh hmeichhia kum 31; hri kai ṭanna hriat, symptom nei lo vek.

Lawngtlai Council Veng - 1: Mipa kum 35, hri kai ṭanna hriat, symptom nei lo.

Lawngtlai Electric Veng - 2: Mipa kum 36 & 45; hri kai ṭanna hriat, symptom nei lo ve ve.