Hawla thu zûk ZPM-in mak an ti

17th December, 2020

ZPM party chuan thuchhuah siamin, MNF MLA 12-te'n an hêk vanga Legislative Assembly Speaker-in a bàn tak Lalduhoma thlavâng hauh tawhtu, MPCC president Lal Thanhawla’n hun rei lo te chhunga a thu a zûk leh ta chu mak an tih thu leh AMC inthlan leh Serchhip biala by-election awm turah ZPM an huphurh vanga an ngaih thu an tarlang.

ZPM chuan, September 24, 2020-ah Lal Thanhawla'n thuchhuah siamin, MNF MLA-te'n Lalduhoma an hêk chu Mizoram mipui leh Serchhip bial mipui zah lohna leh pawisak lohna lian tak nia a hriat thu te, Lalduhoma leh a thawhpui MLA-te chu Congress party chuan ZPM MLA-ah an pawm thlap thu te, mipuiin an pawm thlap thil ching pawr a, mahni thawhpuite paihthlak tuma MNF MLA-te hmalakna a dem thu te, MNF MLA-te hmalakna avangin Mizo Kristiante hming a chhe zawnga hriat reng a nih tawh tur thu leh pawi a tih thute a puanzar thu an tarlang a ni.

MLA aṭanga Lalduhoma bàntir demna thu Lal Thanhawla'n uar taka a chhâk chhuah hnu lawk, December 15, 2020-a Congress Bhavan khârnaah a thu sawi tawhte zûk leh zawnga thu a sawi leh nghal mai chu mak an tih thu sawiin ZPM chuan, "Kan hma lawka AMC inthlan awm tur leh Serchhip bial by-election kan hmachhawn turah ZPM an huphurh vangah kan ngai," an ti.

ZPM chuan, "AMC inthlan awm tur leh Serchhip bial by-election awm turah rorel lai MNF mai ni loin, kan opposition party puite tan pawh huphurhawm leh beih rawn thama ZPM party a awm ta hi party hruaitute thawhrah ni loin, báng loa min ṭawngṭaisaktute vang a ni," an ti a; nasa zawka ṭawngṭaisak zel turin mipui an sáwm a ni.

ZPM party hi hman ní lawka piang, fuke kim pawh la pu hman lo a ni tih sawiin ZPM chuan, "A din tirh aṭangin beitu leh ertu tam tak karah tun dinhmun hi a thleng a, tun hnaiah Zoram mipuite rin hlawh ber leh innghahna awmchhun party niin, opposition party ni chunga zawmtu ngah ber a ni chho ta hi rorelna chelhtu MNF tan chauh ni loin, kan opposition puite tan pawh mutmawh hnàrmawha neih tham a ni ta," an ti a; opposition party dang aṭanga beih an tâwk fo chu hriatthiam har an tih thu an sawi.