Central YLA-in ramri hung an duh

Central Young Lai Association (CYLA) chuan India leh Myanmar ramri hung an duh a, sorkar laipuiin hung a tum chu an thlâwp.

Tun hnaia Mizoram rawn tlawh Ministry of External Affairs (MHA) joint secretary B Shyam nen State Guest House-a an inkawmnaah CYLA hruaitute chuan ramri hung an duh thu an lo hrilh a; B Shyam chuan CYLA hruaitute chu ramri hung tum dan a hrilhfiah.

Vanglaini palai zawhna chhangin CYLA hruaitute chuan, India leh Myanmar ramri chu tlang leh chhengchhe tak takte a nih avangin thirlêna hung phui vek chu MHA tum dan a nih loh thu an sawi a, "Satellite hmanga a ṭul dan anga vilte an tum a ni," an ti.

CYLA hruaitute chuan, Myanmar chu ram buai reng a nih avangin ramri hung a nih chuan sualna chi hrang hrang lakah Mizoram a him phah deuh an rin vang te, Mizoramah crime rate a tlakhniam phah ngei an rin vang te, ramsa inkalpawhna tur ruahman tho a nih dawn vangte leh dan dik taka rawn luh tumte chu an rawn luh theih dawn tho vangtein ramri hung an duh thu an sawi.

MHA Joint Secretary leh CYLA hruaitute hian Kaladan Multi Modal Transit Transport Project kalpui mek bakah Zorinpui (Zochachhuah), Lawngtlai district-a insumdawn tawnna kal mek chungchangte pawh an sawiho a ni.

CYLA hruaitute chuan, India Act East Policy chu ṭha an tih thu leh an thlâwp thu B Shyam an hrilh a, tuna insumdawn tawnna kalpui mekah sorkarin mumal zawka kalpui a nih theih nan hmalakna nei thei se an duh thu an thlen a, immigration check post siam leh border commercial haat buatsaihte an rawt thu an sawi bawk.