Serchhipah Poshan Walk leh ECCE Festival
Integrated Child Development Scheme, Serchhip chuan Rashtriya Poshan Maah (National Nutrition Month) pualin nimin khan Serchhipah Poshan Walk leh Early Child Care & Education (ECCE) Festival an huaihawt a, naupang ṭhahnem tak an tel.
Poshan Walk leh ECCE Festival-ah hian Serchhip khawpui chhunga anganwadi naupangte leh thawktute bakah, YMA, Serchhip Field Veng Branch-a YMA chhangte an tel. Poshan Walk-ah P&E Bazar kâwn atanga Leisekawt Field thleng kawng an zawh a; hriselna ṭha neih theih nan leh naupang ṭhan tiṭha thei tura thlai leh thei ei tam a ṭulzia an aupui a, thutiam an sawi rual bawk.
Leisekawt Field-a ECCE Festival-ah Mizo naupang infiamna chi hrang hrang - kalchhet kal, zawnga leilâwn, inkawibah, arpa insual, inhruipawh, insuknawr, insaihrui pawh, inbâwlvawm, sakuh ui lut, inzuan sansiak, inhrui-zuan, ketami nu intlansiak, pipu uai, inkezungpui pir, kaihbu, inlung vâwr, innâp leh inhnawkte hmangin infiamna buatsaih a ni.
Serchhip child development project officer Caryll Lalpari chuan, naupangte tana infiamna pawimawhzia leh an ṭhanlenna atan te, ṭhenrual kawm an zirna atan te, ṭawng an zirna atante leh an thluak leh rilru hrisel taka an ṭhan chhohna atan infiamna a pawimawh thu a sawi a, "Tunlaia naupang inawmlemna changkang chi hrang hrangte hi man to tak tak a nih hlawm avangin nu leh pate tan phurrit a ni thei a, Mizo infiamna leh inawmtleinate zir thar lehin, naupangin nuam ti taka an infiampui theih tura zirtir thar leh a ṭul," a ti.
Caryll Lalpari chuan, tunlaiin naupangte'n kamram leh hmawmsawm an ei nasat a, vai thil siamte leh ram pawn aṭanga lak luhte hi a tam zawk chu hriselna atana ṭha lo leh háng tak tak a nih hlawm avangin ei tamtir loh a ṭha. Kan ram thlai thar chhuahte bakah thei lamte ei uar ila, kan lo hrisel zawk dawn a ni," a ti a; naupangte chu ei tur ṭha leh hrisel - thlai leh thei ei uar turin a fuih.
Women & Child Development department bultumin Rashtriya Poshan Maah hnuaiah September thla chhungin ‘Rastriya Poshan Maah’ hman mek a ni a, nu leh naupangte ei chhiat lutuk vanga natna leh retheihna ûm bo tumin sorkar department dangte nen kawng hrang hrangin hmalak a ni.