LPG delivery chungchangah thu dik tâwk lo a darh nasa - Gas Distributor

Eirawngbawlna gas (LPG) distributor pawl pahnih - Mizoram Indane Distributor Association (MIDA) leh Mizoram RGGLV Distributor Association (MRDA) chuan thuchhuah inṭâwm siamin, tun hnaiah LPG delivery leh home delivery charge chungchangah thu dik tawk lo social media leh print media-ahte thehdarh a tam hle niin an tarlang.

MIDA leh MRDA chuan, oil marketing company - IOCL, HPCL leh BPCL-te'n sorkar laipuiin inkaihhruaina a siam angin LPG supply-ah a tam thei ang ber digital platform hmang tura a tih thu an tarlang a, "Digital booking, digital payment, DAC, PDC feedback, etc. hi India ram pumah kalpui niin uluk taka vil reng a ni. Tun hnaia sawi hlawh tak delivery authentication code (DAC) leh delivery charge hi thil hrang, inkaih­hnawihna nei lo a ni," an ti.

DAC chu home delivery nen a inkaih­hnawih anga sawi a ni tih tarlangin MIDA leh MRDA chuan, "Home delivery kalpui lohnaah chuan LPG agent-te'n phût kher lo tur anga sawi hi thu dik tâwk lo a ni. DAC hi delivery authentication code a nih ang hian customer-te'n LPG an la ngei a ni tih finfiahna a ni a, home delivery a ni emaw, point delivery (khawlaia sem) emaw pawh ni se, online-a booking ti zawng zawngte'n an kalpui ngei tur a ni," an ti a; chumiin a tum chu black market-a LPG hralh a nih lohna tur leh consumer dik takte hnena LPG pek a nih theih nan a nih thu an tarlang.

MIDA leh MRDA tarlan danin, DAC leh delivery charge chu thil hrang a ni a, DAC avangin delivery charge chawi belh ngai anga sawi leh LPG distributor-te hnena dik lo taka pawisa chawi belhna anga sawi chu thil hriat dik tawk loh a ni. DAC tih avangin pawisa chawi a ngai lo.

Digital parameter hrang hrang DAC, etc. avangin gas distributor-te'n hun, thâ leh sum nasa takin an sên belh nia sawiin pawl pahnihte chuan, "Hengte hi tihtawp a nih theih nana hmalakpui thei an awm chuan thawhhopui kan inhuam reng a ni," an ti.