District 3-ah tuialhthei khuahkhirh

Champhai, Serchhip leh Hnahthial district hotute chuan tunlaia Mizoram kawngpui chhia vanga tuialhthei phur lirtheite'n harsatna an tawh avangin an district-ah tuialhthei khuahkhirhna thupek an tichhuak.

Champhai district civil supply officer CC Sakhawliana chuan, Kawnpui leh Sairang inkar kawng a ṭhat tâwk loh avang leh lirthei a luh ṭhat theih loh avangin petrol leh diesel lak luhah khaihlak awm thei a nih thu a tarlang a; vawi khatah two wheeler tan litre 3, LMV tan litre 10, MMV tan litre 20 leh HMV tan litre 40 bak lak theih a ni lo tih a puang.

DCSO chuan, "Petrol pump zawng zawngte'n dead stock tel loin petrol litre 2,500 leh diesel litre 4,000 tal emergency atan an kawl reng tur a ni. Emergency reserve siam hi DCSO phalna lo chuan pek chhuah theih a ni lo ang," a ti.

Serchhip DC Paul L Khuma chuan, bûr/gallon/barrel hmanga tuialhthei lak khap a nih thu a tarlang a; vawi khatah scooty/scooter tan litre 2, bike tan litre 4, LMV tan litre 10, MMV tan litre 20 leh HMV tan litre 40 lak theih niin, essential commodity phur lirthei liante chu an challan enin an kalna tur mila kal leh haw lam daih pek tur a ni tih a tarlang bawk.

Dead stock tel loin petrol-ah lt. 3,000 leh diesel-ah lt. 5,000 chinah DCSO hnenah hriattir tur a nih thu tarlangin DC chuan, "Dead stock baka control tur chinah chuan DC aṭanga phalna nei chauhte hnenah hralh chhuah tur a ni a, Thenzawl leh North Vanlaiphaia filling station-te chuan SDO (Civil) phalna neite hnenah chauh hralh chhuah tur a ni," a ti.

Hnahthial DC Rita Lalnunmawii Pachuau chuan, "Petrol pump-te'n dead stock tel loin diesel lt. 4,000 leh petrol lt. 3,000 an neih chinah DC/DCSO phalna tel loin tuialhthei an pe chhuak tur a ni lo a, bur/gallon/barrel etc. hmanga lak phal a ni lo," a ti.

Hnahthial district-ah hian vawi khatah petrol/diesel-te two wheeler tan litre 3, three wheeler tan litre 5, LMV tan litre 10, MMV tan litre 20 leh HMV tan litre 40 bak lak phal a ni lo.