Ration card ennawnah complaint 68 lut tawh: Mi 1,00,000 tan qouta kan dil belh - Chhanzova

Food, Civil Supplies & Consumer Affairs (FCSCA) hnuaia ration card enfiah tura din NFSA Selection Committee-in Aizawl Municipal Corporation (AMC) chhunga ration card an ennawn mekah complaint 68 a lut tawh. FCSCA minister B Lalchhanzova chuan, sorkar laipuiah mi 1,00,000 tan ration qouta dil belh mek a nih thu a sawi.

FCSCA department chuan AMC huam chhunga veng 83-ah tun September thla chhungin veng tina NFSA Selection Committee kaltlangin ration card ennawn hna thawh turin a ruahman a; veng 83-ah hian retailer 153 an awm.

NFSA Selection Committee-te hian ration card an ennawn zawh hunah mipui hmuh theih turin list an târ chhuak a, chutah chuan sawi duh nei tan complaint theih a ni. September 13, 2024 thleng khan complaint 68 a lut tawh.

Aizawl East leh Aizawl West DCSO-te chuan, ration card ennawn meka list siamte aṭangin complaint an dawn nual tawh thu Vanglaini an hrilh a, "Complaint tam zawk chu an awmna veng sawn tawh, an veng hluia NFSA hnuaia awm, list thara NFSA hnuai awm tawh lo, awm nawn leh duh an ni. A ṭhen chu a hmaa la awm ngai lo, awm ve inbeisei, mahse, list thara la awm tel chuang lote an ni," an ti a; complaint-te chu zir chian zel a nih tur thu an sawi.

Vanglaini palai zawhna chhangin FCSCA minister B Lalchhanzova chuan, sorkar laipuiin Mizoram hnenah kum 2011 chhiarpui behchhanin mi 7,06,296 tan ration buhfaiah chanpual (quota) a la pek thu a sawi a, "Mihring kan pun zel avang leh 2021-ah chhiarpui neih a ni loh avangin kan ration quota-ah hian mi harsate kan leng lo a, sorkar laipuiah mi 1,00,000 quota kan dil belh mek," a ti.

Mi 1,00,000 tana buhfai chanpual an dil belh chu a hlawhtlin ngei an beisei thu sawiin Minister chuan, "Tunah hian National Family Consumption Survey random an nei mek a, kuminah an zawh theih an inring a, nghak turin min ti. Quota dil belhah hian Chief Minister hmingin Prime Minister-ah DO letter kan pe a, kei pawhin Consumer Affairs, Food and Public Distribution minister Pu Pralhad Venkatesh Joshi ka zuk hmu tawh a, beiseina sang tak kan nei," a ti a; NFSA-ah a awm tur dik takte awm vek se a duh thu leh awm lo tur inzep lui tlatte an ngaimawh thu a sawi.

Lalchhanzova chuan, retailer-te'n March 2024 aṭangin kum danga la awm ngai lo buhfaiah hlêp (saving) an neih thu sawiin, "May thla khan Cyclone Remal vanga retailer-te'n an dil angin quintal 158 chiah saving kan nei a, a bak thla dang zawngah chuan qtl 3,000 chuang zel kan save," a ti.

Supply Minster chuan, kumin October aṭangin retailer lawmman pawisa 50 aṭangin Rs 1.50-ah tihpun a nih dawn thu sawiin, "Retailer-te hian an bûk dik sawt tur a ni a, an lakah kan thîkthu a chhe sawt dawn," a ti a; retailer lawmman tihpun hnua bûk dik loa buhfai hralh an awm chuan sorkarin huai taka hma a lak dawn thu a sawi.

Ration card ennawnin miretheite tan harsatna a thlen dawn loh thu sawiin Minister chuan, "Ration card ennawn a khât lutuk avangin mitthi paih loh a tam em em a, tunah chuan mitthi eng emaw zat kan paih tawh," a ti.

B Lalchhanzova chuan, ration card dik an neih chuan kawng tam takin hmasawnna a awm dawn tih sawiin, "Kan rilru a siamṭhat bakah, kan data a dik dawn. Phûr vang leh châk vang ni loin, Mizoram kal zelna atana thil pawimawh a nih avangin he kawng hi kan zawh a, Minister ka nihna ang pawhin hlen chhuah ngei ka duh," a ti a; Zoram mipuite thawhpuiah a sáwm.

FCSCA Minister chuan, ration card ennawnin a tum ber chu mirethei, NFSA-a awm mamawhte hmaih loh a nih thu a sawi a, "NFSA Selection Committee-ah dik tâwk lo a awm ṭhin a, khawtlang hruaitute an ni a, ration card ennawn mek hi an khawtlang mipuite'n zau tak leh chiang takin hria se ti veng an váng. Tlang au ṭha duh lo an awm a, mipui hriat loha tihfel an châk ni berin a hriat; a mak khawp mai," a ti a; tlangpuiin NFSA Selection Committee-te'n veng mipuite'n zau taka an hriatna turin hma an la tâwk lo tih a sawi.