NH-6 kawng enkawltu contract titawp; Chak takin kawng thawm ṭhat a ni dawn - CM

Chief minister Lalduhoma chuan, NH-6 kawngpuia Kawnpui leh Khamrang inkar enkawltu Satguru-te contract Mizoram sorkarin a tihtawp thu leh an maintenance fund leh state sumte nen chak taka thawm ṭhat a nih dawn thu a sawi.

CM Lalduhoma hian nimin khan a pisaah Mizoram Commercial Vehicle Union (MCVU) hruaitute a kâwm a, tunlaia kawng chhia chungchang a sawipui a; kuminah India ramin ruahtui a dawn ṭhat thu leh chhiatna pawh a thlen nasat thu a sawi a ni.

Lalduhoma chuan, Kawnpui-Khamrang inkar chu Satguru thawh a nih thu sawiin, "Maintenance period-ah a lut mek a, May 2026 thleng awh tur a ni. An maintenance period a nih miau avangin NHIDCL-in a laksak duh si lo a, tun hi a thleng ta a ni. Sorkarin an contract tihtawpsakin, an maintenance fund awm ang ang hi vawiinah Mizoram PWD account-ah a luh beisei a ni a, chu'ng sumte leh state sumte nen chak taka ûm zui a ni. Hna thawktu hi hlawm thumah dah an ni a, vawiin (Thawhṭanni)-ah lung trip 20 a thleng tawh," a ti.

Chief Minister chuan, Kawnpui-Khamrang inkar kawng chu remchang hmasa berah tlawh a tum thu a sawi a; ruahtui vanga an harsatnate hrethiam a, sorkar hmalakna ngaichang turin MCVU hruaitute a ngen.

MCVU hruaitute chuan, kawngpui ṭha tawk lo vanga harsatna an tawh te, tuialhthei man sang chungchang te, lirthei kaihhnawih chhiah leh fitness test chungchang te, state dang aṭanga private car hmanga rinhlelhawm taka rawn vâk vel an tam thute leh a ngaih pawimawh dangte an sawi ve bawk.

Chief Minister hi PWD leh Transport enkawltu minister Vanlalhlana, adviser to CM TBC Lalvenchhunga leh PWD official-te'n an ṭawiawm a ni.