Aikal lak tihtawp tum a nih avangin voluntary pension duh an awm nual

Department of Personnel & Administrative Reforms (DPAR) secretary K Lalthawmmawia chuan Vanglaini palai zawhna chhangin, sorkarin aikal lak a tihtawp hnuah sorkar hnathawk zingah voluntary pension-a chhuak duh an awm nual thu a sawi.

DPAR Secretary chuan, sorkar hnathawk aikal lak titawp tura sorkarin hma a lak hnua an hna la zawm lote an zawh chiannaah chawlh la an lo nih hlawm thu a sawi a, "Chu'ng mite chuan voluntary-a pension an duh tlangpui hlawm. Voluntary-a pension duhte chu sorkarin a dan buai a rinawm loh," a ti.

Voluntary-a pension turin dan anga thil tih ngai a awm thu sawiin K Lalthawmmawia chuan, "Dan anga tihfel ngaite tihfel a nih hma chuan chawlh an neih angte lain an châwl rih mai ang," a ti a, tihfel ngaite tihfel a nih veleh voluntary-a pension tir an nih tur thu a sawi.

DPAR Secretary chuan, aikal late hriattir tura department-te an tih hmasak leh tun hnaia an tih tharah report inmil lo a awm nual tih a sawi a, "A chhan pakhatah chuan, lo pension tawh an awm vang te, thi an awm vangte leh report hmasaa tih hmaih an awm vangte a ni. Tunah hian kan zir chiang chho mek," a ti.