Kuminah sikserh vangin mi 5 thi tawh

Kuminah January - August chhung khan Mizoramah sikserh (malaria) vangin mi panga an thi a, Lawngtlai district mi vek an ni.

Health & Family Welfare department chhinchhiah danin, January-August, 2024 chhung hian sikserh vei nia rinhlelh mi 2,15,039-te thisen endik a ni a, chu'ng aṭang chuan sikserh vei mi 14,634 hmuh chhuah a ni. Sikserh vei hmuh zinga 7,858 chu Plasmodium Falciparum Parasite (PF) an ni a, mi 6,776 chu Plasmodium Vivax (PV) an ni thung.

Aizawl district-ah sikserh vei inringhlel thisen endik tam berin, mi 63,458 endik an ni a, mahse, sikserh vei mi 67 chauh hmuh chhuah a ni. Lawngtlai district chu sikserh vei leh vei lo thisen endik tamna ber dawttu a ni a, thisen 37,274 endik zinga mi 7,003-in sikserh an vei tih hmuh chhuah a ni.

Sikserh vei leh vei lo hriatna atana thisen endik tam ber pathumna chu Lunglei district a ni a, mi 33,056 endik niin, chu'ng aṭang chuan sikserh vei mi 3,188 hmuh chhuah a ni.