Excise Minister hoin Darlawnah ruihhlo do dan tur sawiho a ni

Excise & Narcotics minister Lalnghinglova Hmar hoin nimin khan Darlawn BDO conference hall-ah Darlawna sorkar hotu te, kohhran, kohhran ṭhalai leh tlawmngai pawl hruaitute'n ruilhhlo donaa hmalak zel dan tur an sawiho.

Lalnghinglova Hmar chuan, Darlawn khawtlangin ruihhlo an do zelna turah sorkarin theihtawp chhuahpui a inhuam thu a sawi a, "Ruihhlo donaah YMA-in theihtawp chhuahin, thâ pawh an thawh hnem. VC, kohhran leh MHIP-te pawhin ngaihtuahna thûk zawk kan sênpui a ṭul a, hlawhtling tur chuan kil hrang hrang aṭanga thawhhona ṭha neih a pawimawh," a ti a; nasa lehzuala hma la turin kohhran a ngen.

Ruihhlo ti lo tura inzirtirna zirna-in hrang hrangah nasa zawka kalpui a ṭul thu sawiin Minister chuan, ṭan la thar leh turin zirtirtute a ngen a; ruihhlo donaah sorkar department hrang hrangte thawhho a ṭul thu a sawi a sawi.

Ṭhutkhawm hi Darlawn BDO N Lalzarzova'n a kaihruai a; Darlawn khawtlang leh a chhehvela ruihhlo leh ruihhlo ngaite dinhmun te, ruihhlo donaa hmalak mek dan leh harsatna an tawhte tarlan a ni. Excise Minister hian Darlawn khawtlangin ruihhlo an donaa an hman atan Rs 10,000 a hlan.