KHAWTHLIR

DC-in ṭanpuina pe

Lunglei bawrhsap R Lalṭhazuala chuan nimin khan Mizoram Baptist Kohhran Hmeichhe Pawl (MBKHP) enkawl Melte khuaa Chhawmdawlna In a tlawh a, ṭanpuina a pe. Chhawmdawlna In hi kum 1997-ah din niin, ruihhlo ngaite leh hmeichhe rahbi tleute enkawlna leh chhawmdawlna hmun a ni a; Project Manager hoin thawktu mi 25 awmin, mipa 68 leh hmeichhia 19 enkawl mek an ni. Hmeichhe tan puanṭhui leh la phiar zirna a awm a, mipa tan thing mistiri leh electronic wiring & repair zirnate kalpui a ni thung.

AR-in heroin man

Assam Rifles chuan September 15, Pathianni khan Champhai district-a Mélbûk huam chhungah heroin no. 4 gram 129 an man a, international market rate-in Rs 90,30,000 hû a ni. September 15 vêk khan Zokhawtharah heroin gram 147 an man bawk a, Rs 1,02,90,000 hû a ni. AR sipaite chuan ruihhlo an mante chu Zokhawthar Police Station-ah an hlan a ni.

Mamitah in a chim

September 15, Pathianni zing khan Mamit Vengthara Laldingpuii in chu a ban thlang lam innghahna a min avangin a chim. In hi a chhawng a ni a, Phaizau retailer-in buhfai dah khâwlna atana a hman niin, buhfai ip 60 vel a chimpui. Nimin khan Mamit Hmarveng VC leh YMA hmalaknain khawtlangin hnatlangin an senghawi a ni.

YMA ruihhlo man

Central YMA Kumpuan Committee chuan chawlhkar khat liam ta, September 7-13, 2024 chhung khan heroin (no. 4) hawng 5 leh Tictac bûr 46 an man. Codeine (syrup) bûr 725, alprazolam mûm 16,648, tramadol mûm 81, nitrazepam mûm 501, pregabalin mûm 421 leh clonazepam mûm 10 an man bawk. Ruihhlo man kaihhnawihah hian mi 32 an man a, chu'ng zinga paruk chu home/centre-ah an dah a ni.

ASF vangin vawk 34,244 thi tawh

African Swine Fever (ASF) avangin nimin khan district pangaa khua/veng 10-ah vawk 43 a thi a, district pathuma khua/veng 13-ah vawk 76 suat a ni. Kumin 2024-ah nimin thleng khan khua/veng 236-ah ASF vangin vawk 12,580 a thi tawh a, vawk 21,664 suat a ni tawh; ASF vanga vawk thi leh suat belhkhawm chu 34,244 a ni.