Lengpui-Delhi thlawhtheihna DoNER Minister-in a beisei

Development of North Eastern Region (DoNER) minister Dr. Jitendra Singh chuan, Lengpui Airport to Delhi direct flight a awm theihna atan theihtawp a chhuah tih sawiin, "Direct flight hi a awm theih ngei ka ring," a ti.
Dr. Jitendra Singh hian nizan dar 8:00 khan State Guest House-ah thuthar thehdarhtute kawmin, Lengpui Airport aṭanga Delhi-a thlawhtheihna service a awm theihna atan theihtawp a chhuah thu hi sawiin, "Passenger awm dante kan zir chiang anga, passenger awm dan azirin a thlawk ngunin a thlawk khât mai dawn a ni," a ti a, direct flight hi a sual chhuah theih ngei a beisei tih a sawi.
DoNER minister chuan Mizo­ram chu state naupang tak, mihring pawh tlem tak an ni chunga ziak leh chhiar thiam lama India rama pahnihna a ni thei chu fakawm a tih thu sawiin, "Ziak leh chhiar thiam lamah in ṭhan chak avang leh theihna in neih hi ṭha takin in hmang ṭangkai thei ang," a ti.
Dr. Jitendra Singh sawi dan­in, North East leh Jammu & Kashmir chu sorkar laipuiin a ngai pawimawh a, hmasawnna kawng chak zawka an zawh theihna atan 'special focus' a pe a ni.
DoNER Ministry hnuaiah chuan meeting tura North East aṭanga Delhi pan ngai kher ṭhin chu tihtawp a nih dawn tih sawiin Dr. Jitendra Singh chuan, "Hmar chhak state hrang hrangah DoNER Ministry-in a inchhawkin meeting a nei ṭhin anga, chungah chuan state sorkar official leh NGO-te pawhin an ngaih pawimawh an thlen thei ang," a ti a; Mizoram aṭanga Delhi-a meeting tura kal theih a nih chuan Delhi
aṭangin meeting turin Mizoramah an kal thei ve tur a nih thu a sawi.
Dr. Jitendra Singh chuan NLCPR hnuaiah sum tam tak a lapse ṭhin thu sawiin, "Sorkar laipui leh state sorkarin pawisa a pek chhuah har bakah, DPR peihfel har a nih ṭhin avangin lapse a tam ṭhin. Sum lapse a awm tawh lohna atan theihtawp kan chhuah a, electronic hmanga DPR siamna kan buatsaih anga, chu chuan hun khawhral tur tam tam a veng dawn a ni," a ti.
Vanglaini palai zawhna chhang­in DoNER Minister chuan, "India ram khawpui hrang hrangah law & order a khauh telh telh a, hmarchhak mite laka thil duhawm lo thleng pawh a tlem sawt hle," a ti. Hmarchhak mi zingah India ram khawpui hrang hranga zirna sang tak taka kalte chuan state dangte hriat khawp turin a ṭha zawnga issue siam ve ṭhin se, chu chuan state dangte hriat a hlawhtir anga, inenhranna pawh a tihtlem tur thu a sawi.
DoNER Minister hi nizan vek khan chief minister Lal Thanhawla nen an inkâwm a; CM chuan Mizoram tana theihtawp chhuahpui turin a ngen.
DoNER Minister Jitendra Singh chuan, Mizoram chu a vawi khat kalna a nih thu leh nuam a tih thu a sawi a; Mizo hnam nunphung ṭha a tih thu te, Mizoram zalenna leh ralmuannate chu chhuanawm a tih thu sawiin, chungte chu chhawm nung zel turin CM Lal Thanhawla a chah.
Chief minister Lal Thanhawla chuan, DoNER minister chu Mizo­ram sorkarin ṭha taka thawhpui an duh thu a hrilh a; Mizoram tan theihtawp chhuahpui tur leh, DoNER leh NEC-a Mizoram project-te a hlawhtlin theih nan ṭan laksak turin a ngen.
Dr. Jitendra Singh hian Speaker Hiphei bakah chief secretary hoin sorkar official-te pawh a kawm. Vawiin hian sorkar official-te meeting a neihpui leh ang.
DoNER minister hi NEC-a joint secretary AN Singh leh a additional private secretary N Venkatasan-ten an ṭawiawm a ni.