Zing dar 6 hmaa chhuak maxicab-te Passenger an lam kual phalsak a ni
Aizawl Municipal Council chuan, maxi-cab-te Aizawl khawpui daifémah dinna hmun (stand) bik a siamsak hnuah, zing dar 6:00 hma lama khawpui chhuahsan turte chu Aizawl khawpui chhunga passenger an lam kual a phalsak. Zing dar 6 hnu lama chhuak tur reng reng erawh chu stand thar aṭanga chhuah vek tur a ni thung.
AMC executive councillor (parking) Rosiamliana'n Vanglaini palai zawhna chhanga a sawi danin, mipui aṭanga ngenna a nasat vang leh sorkar hotute thuràwn angin, zing dar 6:00 hma lama khawpui chhuahsan thei turte chu khawpui chhungah passenger lam khawm an phaksak tih a sawi a; chutih rualin, danah chuan khawpui chhunga stand siam leh passenger lam chu phal a nih loh thu a sawi.
Rosiamngheta chuan, mipuite harsatna sutkian kan duh a, kan inràwn khawm hnuah zing dar 6:00 hmaa chhuak turte khawpui chhunga an awm an remti niin a sawi a, "Kan hriatthiam avangin khawpuiah stand neih kan phal leh ta tihna a ni lo," a ti.
Rosiamngheta sawi danin, maxi-cab zing dar 6 hmaa Aizawl chhuahsan turte'n passenger an lam kual an remtih avang hian passenger lamna tur hmun bik, pick up zone la siam an tum a, chumi tur chuan traffic police hotute nen an inráwn ang a, a hmun tur chu an thlang dawn a ni.
Rosiamngheta chuan, zing dar 6:00 hnu lama chhuak maxi-cab reng reng chu khawpui daifêma stand an siamah chauh an ding tur a ni a, chutah chuan passenger an nghakin an chhuak tur a nih thu a sawi bawk.