Lungleia kawngpui dan tihtawp a ni

Lunglei South Ṭhalai Kawng Ṭha Duh Pawl (LSṬKDP)-te'n Thawhlehni aṭanga tiamchin awm loa NH-54-A, Lunglei AOC-Zobawk inkar kawngpui an dan chu nimin khan an chhunzawm a; sorkar nen inremna an neih avangin nimin tlai dar 3:30 vel khan an titawp.

LSṬKDP assistant secretary Vanlalliana Pachuau hnen aṭanga thu dawn danin, LSṬKDP-te'n kawngpui an dan chungchangah hian inremna siampui turin Aizawl aṭangin PWD chief engineer (Highway) John Rammawia chu Lungleiah a kal a; Thawhlehni zan khan Hrangchalkawn tourist lodge-ah LSṬKDP hruaitute nen an inbia a ni.

John Rammawia chuan, LSṬKDP-te thil phût, Lunglei AOC - Zobawk inkar kawngpui chu sorkarin siam nghal a tum thu sawiin, LSṬKDP-te chu kawngpui an dan titawp turin a ngen. LSṬKDP-te erawh chuan, a hma pawhin PWD hotute'n an thu sawi anga thil an tih loh ṭhin avangin, kawng siamna tur work order an hmuh hma chuan kawngpui dan chu an tihtawp theih loh thu an sawi ve thung.

LSṬKDP-te chuan nimin khan kawngpui dan chu an chhunzawm a; Zobawk, Hrang­chalkawn, Three Gate, Luangmual leh Lunglei AOC-ah an duty a ni. Kawngpui dan vangin buaina chhuak lo mah se, lirthei tam tak an tangkhang.

PWD hotute chuan nimin khan kawngpui siam ṭhatna tur work order an tichhuak nghal a; work order chu an hmuh hnuah LSṬKDP pawhin kawngpui dan chu an titawp ta a ni. LSṬKDP hruaitute chuan, PWD hotute intiamna angin, kawngpui chu vawiin hian an siam ṭan nghal dawn niin an sawi.

Kawng siam ṭhat nan hian Rs. 4,51,54,219 ruahman a ni.