Sikul ṭan hma - ram siamṭhatna turah ngai

Minister John Rotluang­liana chuan, Mizoram sor­karin academic session thar aṭanga sikul kài hun a sawn hma chu ram leh hnam siam ṭhatna tura thill pawimawh tak a nih thu a sawi.

John Rotluangliana hian nimina Aizawl South-II Block Congress Extended Meeting, Kulikawn YMA Hall-a neih a hmanpuinaah thu sawiin, "Mizo ṭhalai tam tak zing thawh hma leh zan lama mut nachang hre lo an tam lutuk hi a ngaihmawhawm hle. Hei hian Mizo society leh moral siam ṭhat a ngai hle tih a tilang a ni," a ti.

MSU-in sikul kai hma an duh loh chhan chu zing thawh hma a ngaih vang nia a hriat thu sawiin John Rotluangliana chuan, "Zing thawhma hian kawng tam takin hmasawnna min thlen zawk dawn a ni," a ti a; sikul ṭan hma avang hian a ṭha zawngin result hmuh tur awm nghal lo mah se, kum nga hnuah chuan a ṭhatna hmuh tur a awm ngei tur thu a sawi.

John Rotluangliana chuan zu zawrh chung­chang sawiin, "Dan anga zu zawrh a nih hma pawhin zu in duh chuan an in tho a, zu in ṭhinte'n zu ṭha an in theih nan dan angin sorkarin zu zawrh a phal ta a ni. Sorkarin dan anga zu zawrh a phal hnuah Rangvamual leh Phunchawng panna kawngah zu in tur leh lei tur an tlem a, lirthei jam a awm tawh lo a ni," a ti.