Zorama'n PM bula Kristian thlavang a hauh lo MPCY-in mak an ti

MPC ṭhalai chuan thuchhuah siamin, MNF president Zoramthanga’n New Delhi-a prime minister Narendra Modi leh national security adviser Kumal Doval-te nen inkawmnaah India ram state ṭhenkhata biak-in suasam leh Kristiante nêkchêpna hluar mek a ngaimawh thu a thlen lo chu mak an tih thu an tarlang.

MPCY chuan, Central-a BJP kaih­hruai NDA sorkar a pian hnuah India ram hmun hrang hrangah Kristiante nêkchêpna leh biak-in suasamn a hluar thar hle niin an sawi a, "PM Modi leh Kumal Doval-te nen inkawmna hun ṭha tak neia Myanmar-a remna zawnga a palaina leh thil dangte an sawiho theih laia Kristian nêkchêpna hluar mek a ngaimawh thu a sawi lo hi mak kan ti hle a ni," an ti.

MPCY chuan, "MNF President-in India rama Kristiante dikna leh chanvo humhalhsak turte leh an thlavâng hauh tura chak taka hma la tura Prime Minister a phût lote hi a Kristianpuite tawrhna a hriatpui ngam lo hialah kan ngai," an ti a; tun hnuah chuan Mizoram aṭanga political party hruaitute sorkar laipui dawra kalte chu India rama Kristiante tawrhna hre renga sorkar hruaitu lute dawr ṭhin turin an chah a ni.