Tualthahna ṭum 3-ah chargesheet thehlut

December 2014 leh January 2015-a Aizawl khawpuia tualthahna ṭum thum thlenga mawh­phurtua puhte chu tualthah thubuai siamsak vek an ni a; police-te'n an chhuina chargesheet-te pawh Court-ah thehluh tawh a ni.

January 9, 2015 zana Republic Venga Sangliansiama te chhung­kuaa mi panga thattua puh, Laltlanchhuaha, Republic Veng lakah police-te'n thubuai pahnih - IPC Section 302 hmangin tualthah thubuai leh IPC 449 hmangin phal loh chunga mi ina luh luih thubuai siamsak a ni a; April 8, 2015 khan Court-ah chargesheet an thehlut.

December 17, 2014 zana Zokhumi (83) w/o J Lalsangzuala (L), Mission Veng thattua puh, Lalrempuia (36), Kulikawn chu police-te'n thubuai pahnih - IPC Section 302 hmangin tualthah thubuai leh IPC 380 hmangin rûkrûk thubuai an siamsak. Zokhumi thah thubuaiah hian police-te chuan March 30, 2015 khan Court-ah chargesheet an thehlut tawh a ni.

January 8, 2015-a Lalnunmawia Zadeng, Zarkawt thattua puh, Vanramropuia, Ṭhuam­pui chu police-te'n thu­buai panga an siamsak a; thubuai an ziah luhna dante chu - IPC 302 (tualthah thubuai), IPC 201 (finfiahna tur thil pawimawh tihchhiat leh thu dik lo sawi), IPC 465 (mi bum nana thil lem siam), IPC 471 (lehkha pawimawh a lem siam), IPC 481(thil ruk, mahni ta anga hman)-te a ni.

Vanramropuia thu­buaiah hian April 7, 2015 khan Court-ah chargesheet an thehlut a ni.