VC/LC inthlan tura hming pete vawiinah endik dawn

April 30, 2015-a local council leh village council inthlan tura chuh tuma hming petu chu vawiin hian endik an ni dawn.

Aizawl Municipal Council hnuaia local council inthlan turah chuh tuma hming pe mi 1,264 an awm a; district paruka V/C chuh tum zat erawh nimin tlai thleng khan hriat kim theih a la ni lo.

AMC-a local council 83-ah chuan seat 536 a awm a, chuh tuma hming pe mi 1,264 zinga 937 chu general seat chuh tumte an ni a, mi 327-te chu hmeichhe tana seat hauh chuh tumte an ni.

LC inthlana pawl hrang hrang aṭanga hming pe lut zat chu - INC aṭangin general-ah 361 leh reserved seat-ah 136, MNF-aṭangin general-ah 343 leh reserved-ah 125, ZNP aṭangin general-ah 136 leh reserved-ah 37, MPC aṭangin general-ah 57 leh reserved-ah 14, BJP aṭangin general-ah 12 leh reserved-ah an ni a; independent-a chuh tur general-ah mi 28 leh reserved seat-ah mi pakua an awm bawk.

Aizawl district-a V/C 95 thlan turah seat 387 a awm a, chungte chu general seat 282 leh reserved seat 105 an ni. Mahse, HPC(D)-te vauna vangin Aizawl district-a V/C 24-ah chuan chuh tuma hming pe an awm loh avangin inthlan neih theih a ni dawn lo a; V/C 71-ah inthlan a ni ang. V/C 71-ah hian chuh tuma hming pe mi 834 an awm a, chungte chu general seat chuh tur mi 645 leh hmeichhe tana seat hauh chuh tur hmeichhia 189 an ni.

Aizawl district-a hming pek luh dan chu - INC aṭangin general-ah 229 leh reserved seat-ah 73, MNF aṭangin general-ah 220 leh reserved-ah 59, ZNP aṭangin general-ah 76 leh reserved-ah 20, MPC aṭangin general-ah 19 leh reserved-ah pakua, BJP aṭangin general-ah 20 leh reserved-ah pali an ni a; independent-a chuh tum general-ah mi 101 leh reserved seat-ah mi 26 an awm bawk.

Hetih lai hian, V/C member zat tihtlem a nih vanga Khawruhlian khuaa pawl hrang hrangte'n candidate hming pe lut turte an dan hnuah, SEC chuan Khawruhlian khawtlang ṭanna chu dikah ngaiin, a hmaa V/C member ang zat, pasarih neih a remti a; mahse hun tiam chhunga hming pe lut an awm loh avangin, hming pek luh hun hawn belh a ni a, nomination endik hun leh inhnuhdawh hun hnuhnung chu April 17-ah sawn hlat a ni.

Serchhip district-ah chuan V/C 49 a awm a, chutah chuan seat 215 awmin, general seat 159 leh reserved seat 56 a ni. General seat chuh turin candidate 469 an awm a, reserved seat chuh turin candidate 142 an awm bawk.

Lunglei district-ah chuan V/C 145 a awm a, chuh tura hming pe lut zat hriat kim theih a la ni lo. Champhai, Mamit leh Kolasib district-ahte pawh nomination file zat hriat theih a la ni lo bawk.