2020 atan PC party pisa an khâr

Peoples' Conference (PC) party chuan an pisa chu nimin khan kumin chhung atan an khâr a; khârna inkhawmah an president Lalhmangaiha Sailo chuan, Covid-19 boruakah ei leh bàr leh sum lama Mizoram intodelh lohzia a lang chiang zual tih a sawi.

Lalhmangaiha Sailo chuan, "Covid-19 hian ei leh barah leh finance (budget)-ah kan intodelh lohzia a tilang chiang zual. Hetiang dinhmunah hi chuan sector hrang hrang aṭanga Covid-19-in a nghawng chhiat theih pumpelh turin contingent policy leh programme, a bik takin, agriculture leh health-ah state-in a nei tur a ni," a ti.

Covid-19 hripuiin so­ciety leh economy na tak­in a nghawng tih sawiin Lalhmangaiha chuan, "Tuna sorkar hian heng do tur atan hian economic molecule hâi chhuah policy kalpui turin an inpuahchah a ni àwm a. Molecule a tih ringawt aṭang chuan a tâwk loh hmel riauin ka hria," a ti a; economic molecule chu Mizo zinga mithiamte pawhin an la hriat loh thu a sawi.

PC President chuan, Covid-19 vanga buaina leh harsatna sutkianna atana theihtawp chhuaha hma latute fakawm a tih thu a sawi a, Covid-19 vei thite a ui thu leh an chhungte a tawrhpui thu a sawi bawk.