Serchhipah Anti Drugs Drive Week

Serchhipa police-te'n chawlhkar khat chhung 'Anti Drugs Drive Week' an kalpui tur chu nimin khan Serchhip SP pisa tualah Serchhip SP Sathiya Sundaram-a'n a hawng.

Anti Drugs Drive Week-ah hian thupui chu, 'Serchhip khua hi ruihhlo lakah i venghim ang u' tih a ni. Week chhungin police-te'n ruihhlo zuar leh tawlhte bakah, ruihhlo ti ṭhin an mante chungah khauh zawkin dan an lekkawh dawn a; ruihhlo zuar leh ti an mante chu awlsam taka bail an nih loh nan ṭan lâk an tum a ni.

Anti Drugs Drive Week hawn zawhah Serchhip SP pisaah police hotute leh Serchhipa thuthar thehdarhtute an inkawm a, Krismas leh kumthar thleng tur chungchang an sawiho.

Serchhip SP chuan, Krismas leh kumthar vuakveta police-in hmalak an tum dante a sawi a; sorkar thupek hrang hrangte mipuiin ṭha taka an zawm theih nan mipui zirtir kawnga thawhpuiah MJA member-te a sáwm a ni.

Serchhip MJA president Kapliana Pachuau chuan, ram leh khawtlang tan an theihna zâwnah theihtawp chhuaha thawhpui an inpeih reng thu a sawi.