Ramria Mizoram dinna BEFR 1875 a ni - JAC on ILRF

Joint Action Committee (JAC) on Inner Line Forest Reserve (ILRF) hruaitute chuan nimin khan Aizawl Press Club-ah thuthar thehdarhtute an kâwm a; ramri-ah Bengal Eastern Frontier Regulations (BEFR), 1875 chu Mizoram dinna a nih thu an sawi.

JAC on IRLF chairman F Ngurbiakvela chuan, political party leh NGO zawng zawngte nen Prime Minister hnenah Mizoram leh Assam ramri chingfel turin November 23, 2018-ah joint memorandum an thehlut tih sawiin, "Ministry of Home Affairs chuan state pahnih chief secretary-te leh Survey of India hnenah ni 26.12.2018 khan comment pe turin a hriattir a ni. Sorkar laipuiin ramri chinfel a ngai pawimawh hle," a ti.

Ramri chungchangah district council hun aṭanga tun thlengin NGO, political party, JAC leh mipui dinna chu BEFR 1875 a nih thu sawiin F Ngurbiakvela chuan, "Kan dinna tipelhsawlh zawnga thu chhâk chhuah leh social media-a thuthehdarh i ching lo ang u," a ti a; Assam notification sawi máwi záwng leh Assam ṭan chhan sawhnghehpui thei zawnga che lo turin mipui a ngen.

Kum 1986-a India sorkar leh MNF-in inremna an siam dawnah MNF hotute'n Mizote luah chin ram chu Mizoram state-a rîn luh duhna an put luh thu sawiin Ngurbiakvela chuan, "Inremna thuthlung ngun taka kan chhiar chuan Constitution of India Article 3 anga chinfel theih a nih thu India sorkar aiawhte'n inremnaah ziak telin, ramri chungchang chu nakina la chinfel tur angin an kawhhmuh tih a lang," a ti.

JAC on IRLF Chairman chuan, state ramri chingfel theitu chu Parliament chauh a nih thu sawiin, "Parliament-a bill put luh a nih dawn chuan President recommendation a ṭul a, chuta tan chuan Boundary Commission din a ni ṭhin," a ti a; Boundary Commission din chu Mizorama pawl hrang hrangin Prime Minister hnena memorandum an thehluha an ngen thu a sawi.