Health care atan ADB loan ngaichâng; Mimal damdawi-inte'n cashless an duh lo

Mizoram sorkar chuan health care scheme thar a kalpui tur Universal Health Care Scheme (UHCS) atan Asian Development Bank (ADB) loan a ngaichâng mek. Hetih lai hian, mimal damdawi-in inzawm khawm, Non Governmet Hospital Association of Mizoram (NGHAM) chuan an damdawi-inah sum pek nghal ngai lo (cashles)-a UHCS kalpui an duh lo.

Vanglaini palai zawhna chhangin Health minister Lalrinpuii chuan, cashless-a health care scheme kalpui tur chungchangah mimal damdawi-inte nen inbiakna a kal mek thu a sawi a, "Health care scheme thara inziah luh hun atan October 2024 kan tinzâwn. Hei hi sum min petu tur ADB-in inremna min ziahpui hman leh hman loah a innghat thung," a ti.

Health Minister chuan, ADB-te'n 'October 2024-ah inremna kan ziahpui ang che u' an tih thu sawiin, "Min ziahpui hman ngei dawn em kan hre lo. Min ziahpui hman chuan registration tih nghal theih a ni ang," a ti a; hnam dangte hun sawiah an sawi anga an awm leh loh ṭhin avangin hun tiam chu sawi sual a hlauhawm thu a sawi.

Hetih lai hian, July 12, 2024-a Aijal Club-a NGHAM General Body Meeting chuan resolution pass in, "Mizoram sorkarin Universal Health Care Scheme kalpui a tum chungchang ngun takin kan sawiho a, cashless bik hi chu kan zawm thei lo' tiin thutlukna kan siam," an ti.

NGHAM hruaitute hnen aṭanga Vanglaini thu dawn danin, tun hmaa cashless-a health care scheme kalpui tawh ṭhinah damdawi-in bá a tam ṭhin avangin risk an la ngam tawh lo a ni.