August 2024 thlengin Mizoramah HIV vei mi 31,461 hmu chhuak tawh

Mizoram Legislative Forum on HIV/AIDS chuan Mizorama mi zawng zawng tan HIV enfiah (test) theihna tur kawng dap an rêl. Kum 1990 aṭanga August 2024 thlengin Mizoramah HIV vei mi 31,461 hmuh chhuah a ni tawh.

Mizoram Legislative Forum on HIV/AIDS hi nimin khan Health & Family Welfare minister Lalrinpuii kaihhruaiin Secretariat conference hall-ah an ṭhukhawm a; National AIDS Control Organisation (NACO) ráwn chungin Mizoram State AIDS Control Society (MSACS)-in mi zawng zawng tan HIV test theihna tur kawng lo dap se, an ti.

HIV vei zinga anti retro-viral therapy (ART) damdawi ei chhunzawm lo, an awmna chhui zui hleih theih loh an awm ṭhin chu pawi an tih thu tarlan a ni. HIV+ve te chu an Aadhaar nen thlun zawm dan ngaihtuah ni se, an ti a; naupai laia HIV test tih ngei ngei a ngai angin, mi dangte tan pawh test ngei ngei (mandatory test) theih dan policy duan an rêl bawk.

Ṭhutkhawma tarlan danin, kum 1990 aṭanga August 2024 thleng khan Mizoramah HIV vei mi 31,461 hmuh chhuah a ni tawh a, chu'ng zinga mi 2,541 chu nau paite aṭanga hmuh chhuah an ni. Tun dinhmunah HIV vei ART damdawi la mek mi 16,661 an awm a, HIV vei zinga mi 5,277 an thi tawh.

Mizorama HIV inkai chhâwn tamna ber chu mipat hmeichhiatna hman aṭangin a ni a, HIV vei hmuh chhuah zawng zawng aṭangin 63.93% a ni. Inchiuna hmanrua (needle/syringe) inhman ṭâwm aṭanga kai 30.80% an awm.

Mizoramah a thlawna HIV vei leh vei loh enna hmun Integrated Counselling and Testing Centre (ICTC) 39 a awm a, HIV veite enkawlna ART centre 14 a awm. District tinah ICTC leh ART centre a awm. HIV Estimation 2023-in a tarlan danin, Mizoram Adult HIV Prevalence chu 2.73% a ni a, National Adult HIV Prevalence chu 0.2% a ni.

Health minister Lalrinpuii chuan, "Tun hma chuan HIV natna hi mi awm ṭha duh lo leh ruihhlo ngaite chauh kai theih tura kan ngaih laiin, tunah chuan kan rin loh pui puite'n an kai tawh a, kan fimkhur tlan a pawimawh tak zet," a ti a; member kal khawm (MLA)-te chu an bial ṭheuha thu an sawinaah HIV laka invenna lam uar taka sawi ṭhin turin a chah.

Mizoram Legislative Forum on HIV/AIDS-ah hian chairman chu Health Minister niin, member secretary chu MSACS Project Director a ni a; member-ah MLA 25 an awm a ni.