Mizo mila project siam a pawimawh - Chief Minister

Chief minister Lalduhoma chuan nimin khan a bial Thenzawla Mizoram Handloom Export Facilitation Hub-ah 'IOT Device Deployment in the state of Mizoram' a hawng a; kalphung tharah project kawngbo awm loin, a hmang ṭangkai turte hnen thleng ngei zela hna thawh tur a nih thu leh Mizo mila project siam a pawimawh thu a sawi.

IOT Device hi internet hmanga puan leitute'n awlsam taka chanchin an hriat theihna tur a ni. Puantahah QR code a awm dawn a, QR code scan-in puantahtute, a tahna hmun leh thil pawimawh dangte en theih a ni dawn. Device siamna atan hian North Eastern Council aṭangin sum hmuh a ni a, project hi Ministry of DoNER hnuaiah North East Handicrafts and Handloom Corporation, Guwahati siam a ni.

CM Lalduhoma chuan, mi tam tak eizawnna puantahin hma a sawn zel a ngaih thu leh sorkar lama thawktute pawhin nasa leh zuala ke a pên a ngaih thu a sawi a, "Kalphung tharah project kawngbo awm loin, a hmang ṭangkai turte hnen thleng ngei zelin hna kan thawk tur a ni. State dang kan an lohna tam tak a awm a, project ziaktute'n kan hnam leh kan mite mila project ziah thiam a pawimawh," a ti.

ZOHANDCO chu tihchak zel a ṭul thu sawiin Lalduhoma chuan, "NEHHDC leh agency dang kan tana ṭangkai turte kuangkuah chungin kan kal zel dawn. Thenzawl leh a chhehvela puan tahtute hian puan tahin ei an zawng a ni satliah lo a, kan culture leh kan nihphung an tah tel," a ti a; Mizo hnam tihphung anga puan an tahnaah technology ṭha zawk an hmang thei chu ropui a tih thu leh kawng thui tak kal tur a la awm thu a sawi.

IOT Device hawnnaah hian Commerce & Industries minister F Rodingliana pawhin thu sawiin, "Mizoram hian Industrial Policy ṭha tak kan nei a, chutah chuan subsidy scheme ṭha tak tak a awm. Cluster development ang zawnga hmalak uar deuh deuhte kan tum," a ti a, scheme awmntye chu hmang ṭangkai turin industry neitute a chah.

F Rodingliana chuan, Mizo puantah thiamna ril leh hlu takte chu vawn ṭhat leh uar zel a ṭul thu sawiin, "Industry sawi apianga rilrua lang nghal chu kawlphetha a ni a, kawlphetha lama hmalakna hi kan tluan chuan kumin kum tawp lamah hna kan ṭan thei mai thei," a ti.

IOT Device hawnna hi Commerce & Industries secretary Dr Lalzirmawia Chhangte-in a kaihruai a; Commerce & Industries director Maria CT Zuali, Tourism director R Lalrodingi leh NEHHDC manager Neeraj Kumar te pawhin thu an sawi a ni.

CHIEF MINISTER SAWI DANG

1. Kan mamawh ang taka duan yarn bank kan mamawh a, yarn ṭha ber chi kan tah theih a ṭha.

2. Kan ṭhalaite fashion designing-ah an sang a, lehkhathiam ṭhalai rualte nen ṭanghoin export lam tih dante zir ni se.

3. Puan tahtute tan designer ṭha tak tak awm se, puan ang chauh ni lo deuha product dang tam tak nen khawvel market kan hmachhawn theih hun tur ka nghakhlel.

4. Puan tahtute'n natural yarn - silk leh cotton tah lamah hmasawn tum u la, Sericulture department nen ṭang dunin silk product nasa zawk kan siam chhuak thei ngei tur a ni.