Swachhata Hi Seva 2024 hawn a ni

India ram puma faina beihpui thlakna, Swachhata Hi Seva 2024 chu nimin khan kalpui ṭan a ni a, Urban Development and Poverty Alleviation (UDPA) minister K Sapdanga'n Mizoram Youth Commission auditorium-ah a hawng. Swachhata Hi Seva hi district dangahte pawh hawn a ni a, October 2, 2024 thleng kalpui a ni ang.

Faina beihpui thlakna, Swachhata Hi Seva hi UDPA leh PHE department buatsaih a ni a; hawnna inkhawm zawhah faina hnatlang - Cleanliness Shramdaan neih nghal a ni. Hnatlangah hian UDPA leh PHE-a thawkte bakah, YMA, Maubawk Branch leh Save the Riparian-te an tel a, MYC pisa bul kawng dunga bawlhhlawh an chhar fai bakah, hnim an sâm a ni.

K Sapdanga chuan, faina beihpui thlak hun chung chauha fai tur a ni lo tih sawiin, "Engtik lai pawha fai reng tur kan ni. Kan fai reng theih nan mimal, pawl leh department ang pawha tun aia nasa lehzuala ṭan la turin ka sawm che u a, duhsakna ka hlan bawk a che u," a ti.

Mizote'n fai an harsatna thu sawiin Minister chuan, "Kan bawlhhlawhte hi kawmthlang leh in hnuaia paih mai chi kan ni a, he kan tih dan phung hian nghet takin kan nunah bu a khuar tawh vang nge, fai kan harsat hle. Kum 35 kal ta khan YMA pawhin faina beihpui thlak hi kumpuanah a lo nei tawh," a ti a; YMA branch-te'n theihtawp an chhuah chung pawhin faina lama Mizote thlen a la san loh thu a sawi.

UDPA Minister chuan, khawvela ram fai tak tak chanchinte chu inzirtir nan hman a ṭul thu sawiin, "Engati nge keini hi kan fai theih loh. Singapore kan tlawh ṭuma an tourism officer-in min hrilh ngun ber chu khawlaiah bawlhhlawh chhetê pawh paih loh tur leh pawisa chawi tur a sàn thu a ni. Ram zalen leh rálmuang kan tihte phênah hian dan bawhchhetute hremna khauh tak a awm," a ti a; faina chu dan nen thlun zawm a, inzirtir bakah thununna nena kalpui a ṭul tawha a hriat thu a sawi a ni.

Swachhata Hi Seva 2024 hawnna inkhawm hi UDPA secretary Lalmalsawma Pachuau-in a kaihruai a; UDPA director Dr Andrew H Vanlaldika'n kum danga Swachhata Hi Seva hman tawh dan leh kumina hman dan tur a sawi. Swachhata Hi Seva state nodal officer H Duhkima kaihhruaiin kal khawmte'n faina thutiam an sawi rual bawk.