KHAWTHLIR

Thisen pe

Nimin khan Civil Hospital, Aizawl tan Hrangbana College NSS-in thisen unit 95 an pe a, petute mipa 62 leh hmeichhia 33 an ni a; Republic Higher Secondary School NSS-in unit 31 pein, petute mipa 16 leh hmeichhia 15 an ni a; BJP Mizoram Pradesh pawhin unit 17 pein, petute mipa 15 leh hmeichhia pahnihan ni. Nimin vek khan Ṭawipui North Higher Secondary School NSS-in Lungleiah kalin Civil Hospital, Lunglei tan thisen unit 11 an pe a, petute mipa 10 leh hmeichhia pakhat an ni.

PWD Minister-in Truck neitute kâwm

PWD minister Vanlalhlana chuan nimin khan a pisaah Mizoram Truck Owners Association (MTOA) leh Mizoram Truck Drivers Association (MTDA) hruaitute a kâwm a, NH-6 Kawnpui leh Khàmráng inkar kawng chhia chu tun aia chak zawka siam a nih theih dan tur a sawipui. PWD Minister hoin MTOA leh MTDA hruaitute'n kawng chhia a hmuna enfiah an rêl a ni. Inkawmnaah hian PWD Minister hi Assembly deputy speaker Lalfamkima, Kolasib bialtu MLA-in a ṭawiawm.

Airport kawng tlang

July 9, 2024-a Lengpui Airport kawng, Pûkpui bula min chu PWD-in an siam ṭha tawh a, lirthei chi tin kal theih a ni tawh tih sorkar thuchhuahin a tarlang.

HMV tlan phal lo

Traffic SP Stephen Lalrinawma chuan Durlui (Khamrang) leh Kolasib inkar kawng (NH-6) siam mek chu chak zawka siam a nih theih nan leh Aizawl aṭanga Kolasib kal turte'n harsatna an tawh loh nan September 18-20, 2024 chhungin lirthei lian (HMV) chin chu chhun lamah kal phal a nih loh thu a tarlang. Truck-te chu Ch Saprawnga Truck Terminal, Rangvamualah zing dar 8 aṭanga tlai dar 5 thleng dan a ni ṭhin dawn a; Lengpui lam aṭanga kalte pawh Sairang Buichali lei pêla kal phal a ni lo.

Minister-in hawng

Minister PC Vanlalruata chuan nimin khan Mission Vengthlanga SAI State Training Centre-ah 26th Mizoram Official Taekwondo Championship a hawng. Minister chuan, inelnaa tel turte chu rilru hrisel nei tur leh zuk leh hmuama fihlim turin a chah. Inelna hi ni thum chhung awh tur a ni a, district pasarih aṭangin infiammi 372 an tel.

MLA-in hmanpui

Lunglei District High Powered Committee vice chairman V Malsawmtluanga, Lunglei North bialtu MLA chuan September 16, Thawhṭanni zan khan YMA, Lunglei Zohnuai Branch golden jubilee lawmna a hmanpui. MLA hian ṭhalaite chu theihna an neih leh ram leh hnam tan mawhphurhna an neihte hria a, mahni intodelh a, mahni kea din tum turin a fuih. YMA, Zohnuai Branch hi September 16, 1974-ah din a ni a, member 1,709 an awm mek.

QRT training

Hnahthial District Disaster Management Authority chuan nimin khan Quick Response Team member-te pualin training an buatsaih a, bawrhsap Rita Lalnunmawii Pachuau-n DC conference hall-ah a hawng. Training hawnnaah hian Hnahthiala YMA brabnch tin aṭang mi pahnih ṭheuh bakah, YMA sub-division aṭang mi pakhat an tel a ni.