District-ah faina beihpui thlâkna hawng

India ram pumah faina beihpui thlâkna, Swachhata Hi Seva 2024 chu nimin khan Mizoram district hrang hrangah hawn a ni a, October 2, 2024 thleng kalpui a ni ang. Kumina Swachhata Hi Seva thupui chu, 'Swabhav Swachhata, Sanskaar Swachhata' (Innate Cleanliness, Cleanliness of thought, value and culture) tih a ni.

Siahaah chuan Swachhata Hi Seva hi DC pisa tualah hawn a ni a; SDO (Sadar) Vanlalchhuanliana'n kaihruaiin, additional DC Abraham Beirazi Khithie chuan Swachhata Hi Seva puala hmalakna turte a tarlang.

Swachhata Hi Seva hawnna inkhawm hi zero waste event-a hman a ni a, MADC sorkara LAD sanitation officer Henry PL Hnaihly kaihhruaiin kal khawmte'n faina thutiam an sawi rual. Zirlaite leh sorkar hotute'n DC pisa aṭanga Siaha traffic point thleng bawlhhlawh an chhar fai bawk.

Serchhip bawrhsap Paul L Khuma chuan DC conference hall-ah Swachhata Hi Seva campaign a hawng a, "Khua, veng leh district fai nei turin thawhhona a pawimawh a, sorkarin faina beihpui thlakin nasa takin ṭan la mah se, mipui mimirin nunphunga kan neih loh chuan awmzia a nei dawn lo," a ti. Inkhawmah hian kal khawmte'n faina thutiam an sawi rual a ni.

Serchhip district-ah hian faina beihpui thlak pualin fai intihsiakna hrang hrang buatsaih a nih dawn a; sanitation-a thawktute tan a thlâwna inentirna hawn a ni ang.

Mamit Bazar Vengah district bawrhsap Jacob Lalawmpuia'n faina beihpui thlakna a hawng a, additional DC Malsawmzuala kaihhruaiin faina thutiam sawi rual a ni. National awardee Laltharzeli kaihruaiin Mamit Bazar Veng aṭanga Charkawn thleng faina kawngzawh huaihawt a ni a, sorkar hotu te, khawtlang hruaitute leh naupangte an tel.

Jacob Lalawmpuia chuan, faina beihpui thlâknaah theihtawp chhuaha hmalak a nih dawn thu a sawi a, "Hemi atan hian department, khawtlang hruaitu, zirlaite leh mi tin kan inbuatsaih a ṭul a, ṭan kan lak thar a ngai. Changkannain a ken tel faina beihpui thlak hmang ṭangkaitu ni ṭheuh turin ka sawm che u a ni," a ti.

Saitual bawrhsap Dr Lalngura Tlau chuan DC conference hall-ah faina beihpui thlakna a hawng a, faina thutiam sawi rual a ni. DC chuan, kal khawmte chu faina kawnga department anga hmalaknate chu thla la a, DUDO hnena thehlut zel turin a chah a, "He hmalakna hlawhtling tur chuan mi tin kan pawimawh ṭheuh a ni," a ti.

Hnahthialah chuan Rallangtlang péngah bawrhsap Rita Lalnunmawii Pachuau-in Swachhata Hi Seva campaign a hawng a; sanitation inspection Julie Hmingthansangi kaihhruaiin kal khawmte'n faina thutiam an sawi.

Rita Lalnunmawii Pachuau chuan, faina beihpui thlak turah mi tin an pawimawh thu sawiin, "Swachhata Seva awmzia chu faina service a ni a, chutiang ang ngei chuan faina hi kan tih tur, kan tihmakmawha kan ngaih ṭheuh a ngai," a ti a; mahni mai ni lo, ran vulhte enkawl ṭha a, mi dang tana hnawksak lo tura vulh turin district mipui a ngen.