BJP kalphung leh hnathawh dante hi Kristianna nen a inhmeh - BJP President

BJP, Mizoram Pradesh president Vanlalhmuaka chuan, BJP an nih chhan an chian a ngaih thu sawiin, BJP kalphung leh hnathawh dante chu Kristianna nen a inhmeh thu a sawi.

Seva Pakhwada Week (September 7 - October 2) puala BJP-in nimina thisen pek an huaihawtnaah thu sawiin Vanlalhmuaka chuan, kum dangah pawh mi dangte tana luan chhuahna hun an hman ṭhin thu a sawi a, "BJP kan nih chhan hi kan chian a ngai a, central-a kan hruaituten min chah ṭhin chu, in hnam leh sakhuaah in rinawm tur a ni, hnam leh sakhuaa in rinawm loh chuan ram rawng in bâwl thei lo ang tih a ni," a ti.

Vanlalhmuaka chuan, central-a BJP hruaitute'n thu an chah ṭhin chu Mizorama political party-te'n inenfiahna atan a pawimawh thu sawiin, Kan hnam leh sakhua leh Kristiannaah kan rinawm em? Kristian tih àwm rêngin ram rawng kan báwl em, ram kan kaihhruai em, tih hi kan inzawhna tur a ni. BJP kalphung leh hnathawh dante hi Mizoram mipuite'n min hriatpui u la, Kristianna nen inhmeh em em a ni," a ti a; Kristian an nih anga ram leh hnam rawng an bàwl loh chuan ramin a chhiat phah zel dawn thu a sawi.

Thisen pek puala inkhawmah hian BJP hruaitu Dr K Beichhua, MLA pawhin thu a sawi a, "Mizoramah mi tlawmngai tak takte'n thisen an pe ṭhin a, nimahsela, mamawhtu kan tam em avangin blood bank lam hian duhkhawp an nei thei bik lo. Thisen pek hi uar zel ila, kan thisen hian dam chin a neih avangin thisen kan pek hian kan hriselna atan a hlauhawm lo a, thisen kan pek avangin mi dang nunna hlu tak kan chhan chhuak thei a ni," a ti.