Lungleia home 4-ah naupang 114 enkawl

Lunglei bawrhsap R Lalṭhazuala hoin nimin khan sorkar hotute leh pawl hruaitute'n naupang enkawlna hmun hrang hranga naupangte dinhmun leh sorkar dan anga fahrah leh ngaihsaktu nei lo naupangte faa lak kalpui dan an sawiho. Lungleia naupang enkawlna hmun paliah naupang 114 enkawl mek an nih thu tarlan a ni.

Ṭhutkhawma tarlan danin, Lunglei district-ah hian naupang enkawltu nei lote dan anga faa lak (adopt) an nih theih nana buaipuitu specialised child adoption agency pakhat - Baptist Child Resources Centre (BCRC) a awm. BCRC kaltlang hian kum 2017-2024 chhungin Lungleia home hrang hrang aṭangin naupang 11 chu dan angin miin fa atan an la tawh. Fa lâkte chu Mizoram chhungah mipa pali leh hmeichhia pakhat leh, Mizoram páwnah mipa pali leh hmeichhia pahnih an ni.

Lungleia naupang enkawlna hmun pali a awm a, BCRC-ah naupang pahnih, Baptist Church Orphanage-ah naupang 26, Kawlkhuma Boys Home-ah naupang 16 leh Bethel Centre-ah naupang 70 awmin, an vaiin mi 114 an ni.

Lungleia home hrang hrangte report aṭangin, tun dinhmunah chuan chhungte'n an ngaihven zui loh leh ngaihsaktu mumal nei lo naupang an awm rih lo.

Sorkar thuchhuah tarlan danin, India ramah fahrah naupang, ngaihsaktu leh enkawltu nei lote'n ngaihsaktu leh enkawltu chhungkua an neih a, chhungkuaa an seilen theih nan dan anga faa inlâk theih dan siam a ni a; fahrah (orphan), thlahthlam (abandon) leh tlàwmsan (surrender)-te chu dan anga faa lak theih, legally free for adoption (LFA)-a chhiar a ni.

Tun hnaiah Supreme Court chuan LFA huangah hian orphan, abandon leh surrender bakah, naupang enkawlna hmuna awm naupangte an chhungte'n kum khat aia rei an ngaihven zui loh leh naupang enkawl tlak lo chhungte neite dan anga faa lak theihna danah a dah belh bawk.