Florence Nightingale Awards dawngtu Health Minister-in lawmpuina a hlan

India rama nursing lama thawk ṭha chawimawina, National Florence Nightingale Awards 2024 dawngtu H Mankimi, Serchhip IOC Veng chu nimin khan Health & Family Welfare minister Lalrinpuii'n a pisaah lawmpuina a hlân.

Lalrinpuii chuan, H Mankimi chu a lawmpui thu leh a inpekna leh hnathawh ropui takte chu mi dangte'n entawn se a duh thu a sawi a, "Nurse ṭha chher chhuah lamah ṭan lak a pawimawh. An kutah nunna thui tak a innghah tlat avangin mawhphurhnate rinawm leh taima taka hlen chhuah zel a ṭul," a ti a; Mizorama nurse-te chu damlote tana dawr nuam leh hawihhâwm nih tum turin a chah.

H Mankimi pawhin thu sawiin, nurse-te chu an rawngbawlna ngai pawimawh tur leh inpekna nen theihtawp chhuah ṭhin turin a sáwm a ni.

Health & Family Welfare department hnuaia Selection Committee chuan kumina National Florence Nightingale Award dawng turin Mizoram aṭangin mi pathum an rawt (nominate) a, award dawng turin H Mankimi, ward superintendent (Rtd.) chu thlan a ni. Nomination thehluh laiin H Mankimi hi Serchhip District Hospital-ah ward superintendent a ni a, March 2024 thla tawpah pension-in a chhuak a ni.

H Mankimi hian kum 1986 khan Durtlang Hospital Nursing School aṭangin GNM a zo a, Durtlang Hospital-ah kum thum a thawh hnuah September 7, 1991 khan sorkarah a lut. Award a dawn chhan ber chu - maternal & child (nu leh naute) nunna chhan nana a thawh hlawk vang a nih thu sorkar thuchhuah chuan a tarlang.

Florence Nightingale Award hi kum 1973 aṭangin sorkar laipuia Ministry of Health & Family Welfare-in nurse thawk ṭhate hnenah a hlan a, kum 1983 thleng khan pek niin, Mizoram aṭangin mi paliin an dawng hman. Rokhawlhna avanga kum 20 chuang tawpsan a nih hnuah kum 2007 aṭangin pek chhunzawm a ni a, Mizoram aṭangin mi 16-in National Florence Nightingale Award an dawng tawh a ni.