Ngawrh zawkin kawng chhia siam dawn: 'Kawng chhia vanga harsatna sorkarin pawi a ti' - PWD Minister

PWD minister Vanlalhlana chuan nimin khan National Highway no. 6-a Kawnpui leh Khamrang inkara kawng chhia a enfiah a; kawng chhia avanga Mizoramin harsatna a tawk mek chu sorkarin pawi a tih thu leh sorkarin theihtawpin hma a lak dawn thu a sawi. Vawiin aṭangin ngawrh lehzualin kawng chhia thawm ṭhat a ni dawn.

PWD Miniser hian Kawnpui leh Khamrang inkar kawngpui bakah, Kawnpui quarry bul leh Seṭhawn RTP pêng bula kawng chhe laite a en a; Assemby deputy speaker Lalfamkima, PWD chief engineer (highway) H Ramliana leh officer dang te, Mizoram Truck Drivers Association leh Mizoram Truck Owners Association hruaitute'n an ṭawiawm.

Vanlalhlana chuan, "Kawng chhia vanga Mizoramin harsatna kan tawh mek hi sorkar chuan pawi a ti a, kan ngaihven reng a, hmalakna pawh a kal mek. Thua sawi mai ai hian kawng chhe siam hna hian a takah hun leh thâ, sum leh pai a mamawh hnem hle a, duh angin thil a tih zung zung theih loh a ni. Sorkarin theihtawpin hma a la zel dawn a, mipui pawhin sorkar hmalakna dawhthei taka lo ngaichâng turin kan inngen a ni," a ti.

PWD Minister chuan, NH-6 chu Mizoram châk lakna kawngpui pawimawh a nih avangin kawng chhiate hmanraw neih ang ang pawt khawma theihtawp chhuaha buaipui a nih thu a sawi a; PWD hotute chu hmalaknate uluk taka vil reng turin chah. Kawng chhiate thawm ṭhat a nih chhungin harsatna an tâwk palh a nih pawhin Mizoram pum tana ṭha tur a ni tih hriaa hrethiam turin mipui a ngen bawk.

NH kawngpui chhia thawm ṭhat dan tur leh chak zawka hna thawh theih dan turte PWD Minister hian sorkar official-te leh lirtheia eizawng pawl hruaitute a sawipui a; Kawnpui leh Khamrang inkara kawng chhiate chu chak zawka siam a nih theih nan lirthei tangkhang mekte chu nimina chhuahtir vek hman tura hmalak a ni.

Vawiin aṭanga ni thum chhung lirthei eng chi pawh tlân tlangtir loin, ngawrh lehzuala kawng siam ni se, an ti a; PWD kawng siamna hmanrua an dah mekte bakah, hmanrua leh thawktu tam zawk dah belh se an ti. Ni thum chhung thawm ṭhat a nih hnuah harsatna a awm a nih chuan ruahmanna thar siam leh ni se, an ti bawk.

Kawng siamna atana pawimawh lung chang leh tuialhtheite a thlen zung zung theih dan tur te, lirthei veivâkte awmze nei zawka buaipui dan turte pawh sawiho a ni a; NHIDCL enkawl kawngpuia harsatna thlengte chu a ṭul angte bawhzui thuai tura hriattir ni se, an ti.