Hand Holding hi ṭhalaite theihna chawi kâng tura buatsaihna a ni - CM

Chief minister Lalduhoma chuan, ṭhalaite theihna hai chhuah a, ram economy chawi kângtu atana buatsaih chu sorkar thil tum lian a nih thu leh, Hand Holding Scheme an kalpui tur chu ṭhalaite theihna chawi kângtu ni tura buatsaihna a nih thu a sawi.

CM Lalduhoma hian nimina Mizoram Youth Commission, Honda India Foundation leh Honda CSR Implementing Agency Visan Foundation-te'n MYC Hall-a Project Buniyaad Hotel Management Training an buatsaih a hawnnaah thu a sawi a, "Ṭhalaite theihna hai chhuah a, kan ram economy chawi kângtu atana buatsaih hi kan sorkar thil tum lian pakhat a ni. Mizo ṭhalaite hi theihna nasa tak nei, inbuatsaihna ṭha zawk siamsaka state páwna hna ṭha tak thawk thei an ni a, Hand Holding Scheme hi ṭhalaite theihna chawi kâng a, thawk chhuaktu ni tura buatsaihna scheme a ni," a ti.

Hotel Management Training-a telte chu ṭha taka inzir a, hotel liana thawk tlâka inchher puitling turin Chief Minister chuan a fuih a, "Nangmahnia awm theihna kha ringhlel suh ang che u, in hlawhtlinna hi kan ram hlawhtlinna a ni," a ti a, Mizoram hlawhtlinna chu ṭanrualna leh thawh rahah a inghah thu a sawi.

MYC chairman Malsawmzuala Ralte pawhin thu sawiin, Mizo ṭhalaite tana MYC hmalakna hrang hrang a sawi a; district pathumah group A leh B coaching an kalpui mek thu te, UPSC Prelims-a tling mi pahnih an ṭanpui thu te, British Army-a luh dilna 240 an thehluh tawh thu leh hmeichhe pakhatin kohna a dawn tawh thu te, Mandarin zir turin Mizo nula pahnih Taiwan-ah an tirh mek thu te, NSDC nen ṭang dunin Japan-a thawk turin ṭhalaite tirh an tum mek thute a sawi a ni.

Project Buniyaad training programme hi thla hnih chhung awh tur a ni a, MYC Coaching Centre-ah class kalpui a ni. He project atan hian MYC, Honda India Foundation leh Visan Foundation-te chuan kum khat chhung atan thawhhona thuthlung an ziak.

Nimina hawn tâk Hotel Management Training hi thla hnih chhung awh tur a ni a, mi 39 an tel a ni.