Sept 25 aṭangin NH kawng dan a ni dawn

Kolasib District Land Owners Association (KDLOA) chuan Kolasib district chhunga NH 06 leh 306 (Silchar-Aizawl) kawngpui thlûr li (four lane)-a laih tur kaihhnawihah kawngpui kama ram neitu nihna chungchang chingfel thuai tura sorkar kar nan September 25, 2024 (Nilaini) atangin NH 06 leh 306 an dang dawn.

KDLOA hruaitute chuan nimin khan Kolasib Press Club-ah thuthar thehdarhtute an kâwm a, kawngpui dan an tum thu an puang. September 25, 2024 (Nilaini) zing dar 6 aṭangin Kolasib district-a NH kawngpui an dang dawn a, kawngpui an danna hmun tur chu RTP Farm, Seṭhâwnah a ni.

Kolasib district mipuite'n kum thum hma lam aṭangin ram inchuh avangin buaina leh harsatna an tâwk tih sawiin KDLOA hruaitute chuan, "State sorkar ṭum eng emaw zat kan dawr tawh a, vawiin thlengin harsatna chinfel a la ni lo. Kan lungawi lohna lantir nan leh kan dikna leh chanvo humhim nan hreh tak chungin NH 06 & 306 hi dan (block) ni se tiin kan rel ta a ni," an ti.

Ram neitute'n an dikna leh chanvo nawr chhuak tura kawngpui dan hial a ngai chu pawi an tih thu sawiin KDLOA chuan, Mizoram mipui hriatthiamna an ngen tih an tarlang.

KDLOA chuan, NH kawngpui thlûr lia laih tur avangin kum 2020 aṭangin an ramte chu khawih thei loin sorkarin a khuahkhirh (freeze) tih an tarlang a, "Chhungkaw tam takin eizawn nana kan hman enkawl zui thei loa min siam hi kan mangang tak zet tawh a, min khuahkhirhsakna man zangnadawmna min pe bawk si lo. Ram neitute dikna leh chanvo rahbehsakin kan awm mek a ni. He buaina hi state sorkarin a chingfel thei lo a nih chuan 4-Lane hi cancel tir mai se la, kum 3 chhung kan ram kan enkawl theih loh man erawh min pek ngei kan phût a ni," an ti.

KDLOA tarlan danin, a tir aṭanga an buaina ber chu Forest ram leh mimal ram inchuhna a ni a, tun thlengin chinfel a la ni lo. Vairengte-Sairang inkar kawngpui dung kam tawn tawn metre 800 chu roadside reserve forest a ni tih EFCC department-in tun hma aṭangin mipuiah an puang ngai lo a, reserve forest a nih angin an cheibâwl ngai lo. Kolasib district-a khaw hrang hrangah pi leh pu hun lai aṭang tawhin in hmun, huan lo ramte neiin an inbéngbel a, EFCC aṭangin harsatna an tâwk ngai lo. Revenue department-in in hmun leh ram pass/permit a pe chhuak reng bawk.

Mahse, tun hnaiah four lane kal tur avangin EFCC department-in CA/NPV compensation an duh vangin RRF Notification 1965 tlawhchhanin roadside reserve forest tiin ram an chuh buai thar ta a ni. RRF Notification chu kum 2021-ah High Court-in a ṭhiat a, chumi hnuah EFCC department chuan environmental NGO punin Supreme Court-ah an appeal a, state sorkarin thláwpin, RRF ṭhiahna order chu 'stay' an dil zui a ni.

Vairengte-Sairang inkar kawngpui kama cheng mipuite chu an him lo tih sawiin KDLOA chuan, "Kan in, kan huan, kan ram tia kan lo cheibawlte hi Forest-in min chhuhsak mek. Reserve forest chhunga chengte hi dan loa awm, hnawhchhuah theih reng kan ni. State sorkar hian Kolasib district mipuite dinhmun hi a rang lama a chinfel vat a ngai," an ti.

KDLOA chuan, RRF Notification avanga mipui leh ramin hmasawnna kawnga harsatna an tawh a tam thu sawiin, "Thuneitute'n he dan hi de-notify tir tura hma an lak hi an tihmakmawhah kan ngai," an ti a; RRF chu ram ṭhanmawhbâwk a ni tih hriaa paih thlak a nih theih nan ṭang tlang turin mipui an sáwm.

Mizoramin kawngpui ṭha a mamawh tak zet tih sawiin KDLOA chuan, kawngpui thlûr lia siam tur chu ṭha an tih thu an tarlang a, "Hemi atan hian kan ram pawh ui chung chungin ram hmasawn nan tiin kan pe a, Forest-in an enkawl loh ram inthiam lohna nei miah loa an hauh tlat mai hi bànsan tawh se, Zoramin hma kan sawn phah ngei ang," an ti.