Tuirial HEP tuikhuah kama thingte nasa taka kih a ni

YMA Sub-Head­quarters, Kolasib chuan thuchhuah siamin, Tuirial Hydro Electric Project (HEP) tuikhuah kama thingte nasa taka kih chereu mek a nih thu leh dan loa thingzai nasa taka phurh reng a nih thu an tarlang.

Nasa taka thing kih a ni leh dan loa thingzai phurh a ni reng chu pawi an tih thu tarlangin Kolasib Sub-Hqrs YMA chuan, "Hei hian Tuirial châwmtu tuihna a tikang a, kan environment-in a tuar nasa dawn. He mi chungchang hi sorkar thuneitute sawipuiin, hma la tura ngenna kan thlen tawh ṭhin a, mahse, dan loa thing zai leh phurh chhuah a la pangngai reng tih hriat a ni," an ti.

YMA Sub-Hqrs, Kolasib chuan, dan loa thing zai leh phur ṭhinte chu ti tawh lo tura ngenin, "Sub-Hqrs YMA rorel inkhawmin a rel angin, hetianga ti ṭhinte an awm zui em tih duty neiin uluk takin kan vil mek. Chak zawk leh na zawka hma lak zel tum a ni," an ti a; dan loa thing zai leh phur man an awm chuan hriatthiamna awm loin thuneitute hnenah hlan zel an nih tur thu an tarlang.