RTI Act dilna 32,859 a lut

Mizoram Information Commission (MIC) leh Lunglei District Legal Services Authority chuan nimin khan Lunglei Convention Centre-ah Right to Information Act, 2005 zirhona an buatsaih a; chief information commissioner John Neihlaia'n a hmanpui. September 11, 2024 thlengin Mizoramah RTI Act thlawhchhanin dilna 32,859 a lut tih tarlan a ni.

Chief Information Commissioner (CIC) sawi danin, July 2006-a MIC din a nih aṭanga kumin September 11 thleng khan Mizoramah RTI Act tlawhchhanin information dilna 32,859 a lut tawh a; chu'ng zinga 13,643 chu July 2022-a Online RTI kalpui a nih hnua online aṭanga lut a ni.

RTI chhannaa lungawi lo, Departmental Appellate Authority (DAA)-a zualko (first appeal) 497 an awm a, DAA hmalaknaa lungawi zo loa MIC-a zualko (second appeal) 167 a awm bawk. MIC-a appeal lutte chu chinfel zel a ni a, chinfel loh a awm lo.

John Neihlaia chuan, RTI dan ṭha tak chu mi ṭhahnemngaite'n rei tak an beih hnua an sual chhuah a nih avangin ram siamṭhatna atana ṭangkai taka hman a pawimawh thu a sawi a, "RTI Act-in a tum bulpui ber chu India khua leh tuite thâ tihchak, sorkar langtlang leh rintlak tak siam bakah, hlemhletna ûm bo a ni," a ti.

State public information officer (SPIO)-te chu mipui tana thawk an nihnate an chêt danah tilang a, dikna, rinawmna, ṭhahnem ngaihna leh neitu nihna rilru pua RTI thil tum tihlawhtlingtu ni turin John Neihlaia chuan a chah a, "RTI chhanna pek chhuah chungchangah ṭawngkam hman fuh loh vanga tum loh deuha buaina tawh theih a ni," a ti a, fimkhur leh uluk taka chhanna buatsaih leh dik taka chhan a ṭul thu a sawi.

Information commi­ssioner Mangjangam Touthang pawhin thu sawiin, RTI Act chu mipui hriatna tipungtu, hlemhletna vengtu, thuneitute'n langtlang taka thutlukna an siam theihna tura puitu a nih avangin mipui rorelna ram (democracy) nihphung vawn himna atan a pawimawh thu a sawi a; RTI hnuaia thuneitu (public authority)-te chu an thawhna hmun ṭheuhah a ṭha zawnga danglamna leh hmasawnna thlentu nih tum turin a chah.

Zirhona hi MIC secretary H Dolianbuaia'n a kaihruai a; Lunglei Municipal Council chairman Lalzuithanga leh councillor te, sorkar pisa hrang hrang hotu te, local council member te, MJA member te, YMA sub-headquarters leh branch aiawhte an tel.

Lunglei bawrhsap R Lalṭhazuala, district & sessions judge (DLSA chairman) Vanlalenmawia, chief judicial magistrate (DLSA secretary) Lalthansiami Hnamte leh LMC secretary Lalrinawma ten thil pawimawh hrang hrang an sawi a; zawhna leh chhana hun hman a ni.