Hursualna kaihhnawih dan zirhona infiamna pawl hruaitute tan buatsaih

Mizoram State Commission for Protection of Child Rights (MSCPCR) chuan nimin khan Lianchhiari Hall, IPR directorate-ah Mizoram State Sports Council hnuaia infiamna pawl hruaitute tan infiamna lama naupang leh hursualna kaihhnawih dan bawhchhiatna a awm lohna tura inven dan tur zirhona an buatsaih.

'Prevention of sexual abuse among junior players – challenges and way forward' tih thupui zirhona hi MSCPCR secretary Lalengvari'n a kaihruai a; MSCPCR member Vanhmingliani'n mipat hmeichhiatna, hursualna leh naupang kaihhnawih dan leh hraite infiammite leh sport association hruaitute a hrilhfiah.

Infiammite chungah hursualna vanga harsatna tâwk mi tam tak khawvelah an awm tawh a, a bik takin kum tling lo zingah a tam. Hetiang thil hi Mizoramah a thlen ve loh nan inven dan tur inzirtirna buatsaih a nih thu MSCPCR chuan an tarlang.

MSCPCR chuan, infiammite leh anmahni enkawltute'n dan an hriat a pawimawh thu tarlangin, "Dan hriat loh hi himna a ni lo. Infiammite leh anmahni enkawltu – coach-te leh association hruaitute hi discipline ṭha tak hnuaia awm an nih avangin an hrisel tlangpui a, hei vang hian tum loh deuha mahni naute chunga thuneihna leh thiltihtheihna remchanga laa lo chetsual zeuh hi thil awlsam tak a nih avangin fimkhur a ngai," an ti.

Infiamna chi hrang hranga hruaitute'n an naute chungah mawhphurhna lian tak an neih chu himna a nih thu sawiin, "Khawi emaw laiah harsatna tâwk an awm leh zauh ṭhin hi Mizo zingah chuan thleng lo se tih hi Commission duh dan a ni," an ti a; sport association hruaitute chu an naute himna atan ṭan la zel turin an chah.

Zirhonaah hian aquatic, archery, hockey, arm wrestiling, basketball, chess, cycling, football, indigenous games, wrestling pawl hruaitute an tel a; zawhna leh chhanna hun hman a ni.