Mipuiin Congress party-ah beiseina an nghat thar mek - MPCC Treasurer

Mizoram Pradesh Congress Committee (MPCC) treasurer Dr Lalmalsawma Nghaka chuan, Mizoram dinhmun enin, ZPM sorkar chungah mipui beiseina a hniam sâwt hle nia sawiin, Congress party-ah mipuiin beiseina an nghat thar leh mek niin a sawi.

Dr Lalmalsawma Nghaka hian nimin khan Aizawl South-II Congress Block hruaitute nen an ṭhutkhawmnaah thu sawiin, "Kan ram dinhmun en hian ZPM sorkar chungah mipui beiseina a tlahniam sâwt hle. MNF lam han thlirin an sorkar laia mipui min sawp retheihzia mipui thinlungah nimin ang mai a la chiang a, Congress party-ah hian mipuiin beiseina thar an nghat leh mek tih a hriat theih tawh," a ti.

ZPM sorkar chu inthlan hmaa an intiam dante leh an sorkar hnua an chet dan inang lo hle nia sawiin Dr Lalmalsawma chuan, "ZPM sorkar chêt chhiatna ringawt hi keini chuan thawh kân lehna tura innghah chhanah kan hmang dawn lo a, Congress party chuan policy ṭha leh tihhlawhtlin theih ngei kan nei ang," a ti a; sorkar ṭha din leh kalphung dik Mizoram mipui hnena pek chu an mawhphurna pawimawh ber leh politics-a an awm chhan a nih thu a sawi.