Hna lakna kal lai sût thut mak an ti

MZP General Headquarters chuan, tun hnaia Commerce & Industries department (Commerce Wing)-a assistant marketing inspector pakhat lak tur, exam buatsaih tawh leh interview tura kohte'n interview-na hmun tur an thlen hnua hna lakna sût (cancel) a ni chu mak an tih thu an tarlang.

MZP thuchhuah tarlan danin, CI department (Commerce Wing)-a assistant marketing inspector pakhat lak turah hian October 6, 2023-ah advertisement chhuah a ni a, July 19, 2024-ah written exam buatsaih a ni. Exam-a tling mi 10-te chu personal interview nei turin September 10 khan CI Secretary room-ah an kal a, koh hun an nghah laiin hna lakna chu cancel an nih thu leh application fee lâk lêt theih a nih thu hrilh an ni.

Sorkar thil tih dan chu an ngaih thutak thu sawiin MZP chuan, thil thlen dan uluk taka chhui a, tisualtu hrem ngei turin sorkar an ngen a, "Hna zawng mekte inbuatsaihna tithlâwn tur leh rilru na taka siamtu hi hrem ngei kan phût a, department pawh ngaihdam dila sawifiah turin kan phût bawk," an ti.