Sik leh sá inthlakin hriselna a nghawng tihnêp dan tur sawiho

State Governing Body Meeting on Climate Change and Human Health chu nimin khan Health & Family Welfare minister Lalrinpuii hoin Secretariat conference hall-ah an ṭhu a; sik leh sá inthlakin mihring hriselna a nghawng dan, invên dan tur leh tihnêp dan turte an sawiho.

Health Minister chuan, nasa taka sik leh sa inthlak avangin mihring hriselnain nasa takin a tuar thei tih sawiin, "Hriselna bakah khuarel chhiatna kan tih tam tak pawh hi sik leh sa inthlak vanga lo thlengte a ni. Sik leh sa nasa taka inthlak vanga kan tawrhnate hi department pakhat chauhin hmachhawn theih chi a ni lo a, department hrang hrang ṭanho ngaihna thil a ni," a ti.

Ṭhutkhawmah hian HFW secretary Sangchin Chinzah, NHM mission director Dr Eric Zomawia leh NHM state nodal officer Dr Vanlalrengpuia ten sik leh sa inthlak chungchanga sorkar hmalak tawh dan leh hriat tur pawimawhte an sawi a; Health Minister-in State Action Plan on Climate Change and Human Health a tlangzarh a ni.