Hmun hnihah ECCE Festival buatsaih

Aizawl district-a Integrated Child Development Scheme (ICDS) District Programme Office leh Urban ICDS-te chuan Rashtriya Poshan Maah (National Nutrition Month) kal mek pualin nimin khan Dawrpui Multipurpose Hall-ah Early Childhood Care and Education (ECCE) Festival - 'Indigenous Sports-cum-Training of Master Trainers of Indigenous Games an buatsaih.

ECCE Festival-ah hian Mizo naupang infiamna chi hrang hrang - ketaminu intlansiak, arpa thai, záwnga leilâwn dím dím, sakuh ui luh, kalchhet, insuknawr, inhruipawh, inkawibah, inzobah, buhfai vâwr leh invâwr hmangtein infiamna buatsaih a ni a, an inhrilhfiah zel bawk.

Festival-a khuallian Zoramthangi Chhangte, Women & Child Development director chuan, tunlaiin thisen tlâkchham a hluar thu sawiin, ei leh in turte hrisel zawka siam a ṭul thu a sawi a; thlai hring leh thei ei tam a ṭul thu leh nautein thla 6 a tlin tawh chuan nu hnute tui ringawt ring lo a, ei tur ṭha dang pek a ṭhat thu a sawi bawk.

ECCE Festioval-ah hian Mizoram Indigenous Games Association president Lalhruaitluanga pawhin thu sawiin, Mizo hnam infiamna tihlâr leh thehdarh kawnga thawhpuiah kal khawmte a sáwm.

Hnahthialah pawh September 17, Thawhlehni khan UDPA department leh Integrated Child Development Scheme (ICDS)-te'n ECCE Festival leh Swach Bharat Cultural Fest an huaihawt a, district bawrhsap Rita Lalnunmawii Pachuau-in a hmanpui.

ECCE leh Swach Bharat Cultural kûtah hian thil siam chi hrang hrang te, hmânlaia Mizo bungrua hrang hrang te, Mizo naupang infiamna hmanrua te, Waste to Art display-te pho chhuah a ni a; Hnahthial district-a anganwadi centre 20 aṭangin naupang te, thawktute leh nu leh pate an tel a ni.