KHAWTHLIR

Thisen pe

Durtlang Higher Secondary School NSS chuan nimin khan Synod Hospital blood bank-ah kalin thisen unit 24 an pe a, petute mipa 17 leh hmeichhia pasarih an ni. Durtlang HSS zirlaite hian Swachhta Hi Seva pualin Synod Hospital campus an tifai bawk.

Lirthei tlân khap

Kolasib SP David H Lalthangliana chuan Kolasib leh Durlui (Khamrang) inkar kawng NH-06 thawm ṭhat hna thawh a chak zawk thawh theih nan September 19-21, 2024 chhungin Kawnpui-Khamrang inkarah lirthei tlân khap a nih thu a puang. Harsatna tâwk leh thu thlen duh nei tan Kolasib PS OC phone number 7085130812 leh IC Traffic Cell phone number 9862306914-ah biak theih a ni ang.

Heroin man

Excise & Narcotics department leh Central YMA Kumpuan Committee chuan nimin tlai dar 3:30 khan Aizawl By-pass Road-a College Veng huam chhungah Zonunsangzela (38) s/o Lalengmawia, Maubawk Tlangvenga khawsa nia inchhál hnen aṭangin heroin gram 111 (hawng 10) an man. Narcotics Drugs & Psychotropic Substances Act, 1985 tlawhchhanin thubuai ziah luh a ni.

AR-in pistol man

Assam Rifles chuan September 16, 2024 khan Siaha district-a Tuitlawk bulah pistol Colt .22 revolver leh a mû 50 an man. AR-te hian report an dawn angin Tuitlawk bulah mobile vehicle check an nei a, Siaha aṭanga Amyobu pan mi pahnih hnen aṭangin pistol leh a mu hi an man a ni.

Chief Secretary tel

Mizoram chief secretary Dr Renu Sharma chu nimina New Delhi-a North Eastern Centre for Technology Application and Reach Governing Council meeting vawi 12-naah a tel a, Mizoram sorkar project pahnih DPR leh project panga concept note-te sorkar laipui hotute hnenah a thehlut. Meeting hi hmarchhak bial hmasawnna atana tunlai thiama hman ṭangkai dan sawihona a ni a; CS hi chief scientific officer H Lalsawmliana'n a ṭawiawm a ni.

Khuai khawi zirtir

ICFRE - Bamboo and Rattan Centre, Bethlehem Vengthlang chuan nimin khan Hualngohmun khuaah ni thum awh tur 'Training on Apiculture' an buatsaih ṭan a, vawiin leh naktukah chhunzawm a ni ang. Training hi Van Vigyan Kendra, Mizoram hnuaia buatsaih a ni a, a hawnna hi Horticulture additional director L Lalhmingmawia Pachuau-in a hmanpui. Ni thum chhungin Hualngohmun khuaa mi 20-te khuai khâwi zirtir an ni ang.

Venture Capital Fund sawiho

Chief minister Lalduhoma hoin nimin khan Planning & Programme Implementation department hotute'n Security Exchange Board of India (SEBI) ruahman anga Mizorama Venture Capital Fund kalpui dan tur an sawiho. Hand Holding Scheme nena kalkawp thei, Mizoram investment ngêlnghet leh mumal a awm theihna tur a nih avangin Venture Capital Commitment neih ve ṭha an ti a ni.

Literacy Day

Hnahthial District Hub for Empowerment of Women chuan nimin khan DC conference hall-ah Mission Shakti hawnna leh International Literacy Day lawmna hun an buatsaih a; bawrhsap Rita Lalnunmawii Pachuau-in Mission Shakti a hawng. He hunah hian 'Beti Bachao Beti Padhao' puala lemziak leh essay-a intihsiak lawmman sem a ni.