BJP President-in Mizoram a tlawh Kohhran hruaitute'n Kristian-te thlavang hauh turin an lo ngen

BJP president Amit Shah chuan nimin khan zan khat riak turin Aizawl a rawn tlawh. Nimin chawhnu khan Vanapa Hall-ah vantlang inkhawm neiin, Mizoram ṭhalaite hmasawnna atan cheng vbc. 1200 ruahman a nih thu a sawi. Amit Shah hnenah hian Mizoram Kohhran Hruaitute Committee (MKHC) chuan Kristiante chunga hlei­lenna a tawp theihna atana theihtawp chhuah turin an ngen.

Vanapa Hall-a inkhawmah Amit Shah chuan Hindi-in thu a sawi a, hlemhletna avangin hmarchhakah hma­sawnna a muang tih sawiin, "Sorkar laipui chuan hmarchhak hi eiruknain hmun a chan lohna hmun ni se a duh. Eirukna hi tih­tawp tum a ni a, eiruk tumte hriat chhuah an nih chuan an lakah kutthlak a ni ang," a ti.

BJP-in sorkarna a chan hma­sak aṭangin hmarchhak state-te chu a bika tihhmasawn tuma an beih thu sawiin BJP President chuan, "DoNER Minis­try hmangin hmarchhak hi enkawl a ni ang. Hmarchhak inekawlna lama harsatna awm ṭhinte tihfel tum a ni," a ti a; DoNER Ministry-in hmarchhak state hrang hrangah camp a buatsaih ṭhin tur thu a sawi.

Cabinet Minister-te'n hmar­chhak state hrang hrangte an fan kual tur thu sawiin, "Hmarchhak state-te'n Delhi an pan ngai tawh loin, Delhi-in hmarchhak state-te a pan tawh ang. Cabinet Minister zin hian rah ṭha chhuahin, hmarchhak state-te'n hmasawnna an neih theih phah dawn a ni," a ti.

Amit Shah sawi danin, BJP chuan hmarchhak state-te chu kawng engkimah mahni dinhmun sawh nghet thei tura hmasawntir a tum a ni.

BJP President chuan, Mizo­ram mipuite chu sorkar laipui nena innghêng a, Mizoram hma­sawnna atana theihtawp chhuaha thawhpuiah a sawm a; kumin December thla hma ngeiin Mizoramah BJP office pui sak tum a nih thu a puang.

BJP general secretary (Orga­nisation) Ram Lal Ji pawhin thu sawiin, "BJP chuan mipui leh mi narânte tan hna a thawk ṭhin. Thu kan sawi tam lo a, hna kan thawk ṭhin," a ti.

Ram Lal Ji sawi danin BJP chuan ram an ngai pawimawh hmasa ber a, chumi dawtah party dahin, pathumnaah mahni an indah a, "Political party chu ram tana inhlan tur a ni a, ram tan kan inhlan chuan ram a ropui ang. Kan policy chu hmasawnna rualkhai taka thlentir leh mi tin tana rorelna dik siam hi a ni," a ti.

Amit Shah hian vantlang inkhawm zawhah Aijal Club-ah NGO leh kohhran hruaitute a kâwm a ni.

Inkawmhonaah hian MKHC chuan, India ram hmun ṭhenkhata Kristiante chunga hleilenna awm ṭhin tihtawp a nih theihna atana theihtawp chhuah tur leh, Kristiante ni pawimawha sorkar function buatsaih lo tura ngennate an thlen. Hei bakah hian Prime Minister hnena pek turin an ngaih pawimawh hrang hrang an tarlante an pe nghal a ni.