KHAWTHLIR

Thisen pe
J Buana College, Lungleia zirlaite chuan nimin khan Lunglei Civil Hospital-ah thisen unit 57 an pe a, a petute mipa 34 leh hmeichhia 23 an ni.

IAS-ah kai
MCS officer pahnih - K Lalthawmmawia, School Education director leh Vanlalngaihsaka, Mamit DC-te chu IAS-ah hlankai an ni. IAS-a kaitirna order chu April 13 khan Ministry of Personal, Public Grievances & Pensions-in a chhuah a, AGMUT cadre pek an ni.

Bandh neih tum
MSU regional headquarters Lunglei, Chawngte Area Students’ Union, Pang Zirlai Pawl, Lunglei-Pangzawl Students’ Union leh PRISM sub-headquarters, Lungleite chuan thuchhuah siamin, sikul ṭan hun tihhma sût an phûtna sorkarin a tihhlawhtlin loh avangin April 20, 2015, zing dar 6 aṭangin tiamchin awm loin Lungleiah total bandh huaihawt an tum tih an puang.

Ruihhlo man
Lungleia Excise & Narcotics enforcement-te chuan April 15, 2015 chawhnu dar 1:30 khan Lunglei College Veng­ah ruihhlo, Cipla mûm 1,601 an man a; a neitute - Lalrammuana (30) s/o Lalramsanga, Rahsi Veng leh Lallawmpuii (38) d/o Zuamdova (L), Lunglawnte an man bawk. Cipla hi spasmo proxyvon ang deuh a ni a, an man zat hi local market-ah Rs. 80,000 vel hu a ni.

Thawhho rel
NLUP Implementing Board (NIB) chairman JH Roṭhuama hoa nimina NIB leh Mizoram Environment & Forest Consultative Forum (MEFCOF) hotute ṭhukhawm chuan, Mizoram chhunga ramngaw, ramsa, tui leh nungchate humhalhna atana thawhho an rel.

Zirlaibu hrilhfiah
SCERT chuan nimin khan Aizawl East sub-divisional bial chhunga headmaster 65-te an ko khawm a, primary school zirlaibu thara hrilhfiah ngai leh hriattur pawimawhte
an hrilhfiah.