DoNER minister leh officer-te inkâwm

DoNER minister Dr Jitendra Singh chuan Nilaini zan khan State Guest House-ah sorkar officer-te a kâwm a; hmarchhak state tih­hmasawn chu prime minister Narendra Modi ngaih pawimawh ber zinga mi a ni tih sawiin, DoNER Ministry-in theihtawp a chhuah tur thu a sawi.

Dr Jitendra Singh chuan, hmarchhak state-te'n DoNER dawr tura Delhi an pan a ngai ṭhin tih sawiin, "DoNER hian hmarchhak state harsatnate sutkianpui turin a rawn pan ve fo tawh zawk dawn. Prime Minister duh danin Union Minister pariatte chuan hmarchhak state-te chawlhkar hnih danah an tlawh ziah dawn a, chumi kal zelah Union Minister pakhatin Mi­zoram pawh May thla chhungin a rawn tlawh leh dawn a ni," a ti.

DoNER joint secre­tary AM Singh pawhin thu sawiin, Mizoram sorkara department hrang hrang, DoNER nena hna thawkho ṭhinte chu information technology hmang ṭangkai turin a fuih a, "Internet hmangin awlsam zawkin DoNER hi dawr theih a ni," tiin, department hotute chu DPR software hmang ṭangkai turin a chah.

Dr Jitendra Singh leh AM Singh-te hian nimin khan sorkar official hotute an kâwm leh a, chumi hnuah nimin chawhnu khan Mizoram an chhuahsan a ni.