Aizawlah Passport Seva Kendra dah thar

Aizawla passport office, Mini Passport Seva Kendra chu nimin khan Passport Seva Kendra-ah hlankai a ni.

Aizawla Mini Passport Seva Kendra hian kum 2012 aṭanga December 31, 2014 thleng khan passport siam dilna 4,886 a dawng tawh.

Aizawla Mini Passport Seva Kendra ni mek Passport Seva Kendra-a hlangkai tur hian Guwahati-a regional passport officer T Ajumla Jamir, IFS leh Ministry of External Affairs-a joint secretary Muktesh K Pardeshi, IFS-te chuan nimin khan Aizawlah an rawn thleng.

Passport Seva Kendra, Aizawla thawkte hnen aṭanga thu dawn danin, Mini Passport Seva Kendra aṭanga Passport Seva Kendra-a hlankai a nih avang hian passport dilnaah thil a awlsam phah vak dawn lo a, Aizawla dilna lutte chu Regional Passport Office, Guwahati-ah thawn zel a la ngai tho dawn.

Mini Passport Seva Kendra a nih lai chuan passport dilnate chu a diltu ni kher lo pawhin a thehluhsak thei a, a diltu a inlan kher a ngai lo. Passport Seva Kendra-ah erawh chuan pass­port diltu a inlan kher a ngai tawh dawn a; diltu kutzia (finger print)-te lak a ngai tawh ang. Finger print lakna tur leh thil dang atan khawl thar eng emaw zat pek belh an ni.

Application chu hard copy leh online hmangin thehluh zel theih a ni dawn a; fee pawh net banking hmangin pek theih a ni ang.

Aizawla Mini Passport Seva Kendra hi July 17, 2012-ah ṭan a ni a; a ṭan tirh aṭanga December 31, 2014 thleng khan passport dilna 4,886 an dawng tawh. Dilna an dawn zinga 351 chu sorkar hnathawkte an ni a, 4,535 chu sorkar hnathawk lo an ni. Kum 2012-ah dilna 614, kum 2013-ah 2,188, kum 2014-ah 2,084 an dawng a ni.